કાશ્મીર કરતા તો અફઘાનિસ્તાનની હાલત સારી છે : પૂર્વ CM મહેબૂબા મુફ્તીનો BJP ઉપર પ્રહાર

જમ્મુ-કાશ્મીરના પૂર્વ મુખ્યમંત્રી અને પીડીપીના વડા મહેબૂબા મુફ્તીએ સોમવારે દિલ્હીમાં એક પ્રેસ કોન્ફરન્સને સંબોધિત કરતા ભાજપ પર નિશાન સાધ્યું હતું. મહેબૂબા મુફ્તીએ આરોપ લગાવ્યો કે ભાજપે જમ્મુ-કાશ્મીરને અફઘાનિસ્તાનમાં ફેરવી દીધું છે. રાજ્યમાં અતિક્રમણ વિરોધી ઝુંબેશના ભાગરૂપે ગરીબ અને સીમાંત લોકોના મકાનો તોડી પાડવા માટે બુલડોઝરનો ઉપયોગ કરવામાં આવી રહ્યો છે.

બંધારણને તોડવા બહુમતીનો ઉપયોગ

દરમિયાન, પીપલ્સ ડેમોક્રેટિક પાર્ટી (પીડીપી) ના વડાએ દેશના વિરોધ પક્ષોના નેતાઓને અપીલ કરી હતી કે તેઓ ભાજપ દ્વારા કરવામાં આવી રહેલા અત્યાચારો માટે મૂક પ્રેક્ષક ન બને. તેમણે આરોપ લગાવ્યો હતો કે ભાજપ બંધારણને તોડવા માટે પોતાની બહુમતીનો ઉપયોગ કરી રહી છે. તેમણે કહ્યું કે પેલેસ્ટાઈન પણ જમ્મુ-કાશ્મીરની હાલની સ્થિતિ કરતાં સારી છે. ઓછામાં ઓછા લોકો ત્યાં વાત કરવા સક્ષમ છે. તેમણે કહ્યું કે, જે રીતે લોકોના મકાનો તોડવા માટે બુલડોઝરનો ઉપયોગ કરવામાં આવી રહ્યો છે કાશ્મીર અફઘાનિસ્તાન કરતા પણ ખરાબ થઈ રહ્યું છે. મહેબૂબા મુફ્તીએ કહ્યું કે સરકારના મતે સદીઓ જૂનું શંકરાચાર્ય મંદિર અને તત્કાલીન મહારાજા દ્વારા બનાવવામાં આવેલ કેન્ટોનમેન્ટ પણ અતિક્રમિત જમીન પર છે.

‘એક દેશ, એક ભાષા, એક ધર્મ’ના નારા લગાવવા લાગ્યા

પીડીપી નેતાએ કહ્યું કે લેફ્ટનન્ટ ગવર્નર મનોજ સિન્હા દાવો કરે છે કે અતિક્રમણ વિરોધી અભિયાન દરમિયાન ગરીબોના ઘરોને નુકસાન થશે નહીં, પરંતુ જમીન પર તેનાથી વિપરીત થઈ રહ્યું છે. ટીન શેડવાળા મકાનો પણ તોડી પાડવામાં આવી રહ્યા છે. મહેબૂબા મુફ્તીએ કહ્યું, ‘એક સંવિધાન, એક કાયદો, એક પ્રધાન’ ના નારા આપનારા હવે ‘એક દેશ, એક ભાષા, એક ધર્મ’ના નારા લગાવવા લાગ્યા છે. અને એવું લાગે છે કે દેશમાં બંધારણ નથી.