ડુપ્લીકેટ ચલણી નોટ નહીં પણ સિક્કાના જામેલા ધંધા ઉપર પોલીસનો દરોડો, મુંબઈથી શખસ ઝડપાયો
દિલ્હી પોલીસના સ્પેશિયલ સેલે મુંબઈના એક વ્યક્તિની ધરપકડ કરી છે જે દેશભરમાં નકલી સિક્કા બનાવનારાઓ પાસેથી મુંબઈ અને તેની આસપાસના વિસ્તારોમાં સિક્કા સપ્લાય કરતો હતો. પકડાયેલા આરોપીની ઓળખ જીગ્નેશ ગાલા (ઉ.વ.42) તરીકે થઈ છે. પોલીસે તેની પાસેથી પર રૂ. 9.46 લાખના નકલી સિક્કા રિકવર કર્યા છે. પ્રાપ્ત થયેલા તમામ સિક્કા 10-10 રૂપિયાના છે. છેલ્લા બે વર્ષમાં આરોપીએ મુંબઈ અને તેની આસપાસના વિસ્તારોમાં કરોડો રૂપિયાના નકલી સિક્કા મૂક્યા છે. આરોપીનું કહેવું છે કે 10 રૂપિયાના સિક્કાની કિંમત ખૂબ જ નાની રકમ છે અને કોઈ તેની તપાસ પણ કરતું નથી. તેથી તે સલામત વ્યવસાય હતો. પોલીસે પકડાયેલા આરોપીની પૂછપરછ કરીને આ મામલે વધુ તપાસ હાથ ધરી છે.
નકલી સિક્કા બનાવતી ગેંગ 2022માં ઝડપાઇ
સ્પેશિયલ સેલના ડેપ્યુટી કમિશનર ઓફ પોલીસ અંકિત પ્રતાપ સિંહે જણાવ્યું હતું કે એપ્રિલ 2022માં તેમની ટીમે નકલી સિક્કા બનાવી દેશભરમાં સપ્લાય કરતી ગેંગનો પર્દાફાશ કર્યો હતો. પોલીસે નરેશ કુમારને પકડી લીધો હતો. તેની પાસેથી 10-10 રૂપિયાના 10 હજારથી વધુ સિક્કા મળી આવ્યા હતા. જે બાદ ચરખી-દાદરીમાં દરોડા પાડીને સિક્કા બનાવવાની ફેક્ટરી પકડાઈ હતી. પોલીસે ત્યાંથી ચાર લોકોની ધરપકડ કરી હતી અને લગભગ 10.48 લાખની કિંમતના પાંચ, 10 અને 20 સિક્કા કબજે કર્યા હતા. ત્યાંથી મોટી માત્રામાં કાચો માલ પણ મળી આવ્યો હતો.
વીશેક વખત સિક્કાઓની હેરાફેરી કરી
તપાસ દરમિયાન પોલીસને ખબર પડી કે આરોપી દેશભરમાં નકલી સિક્કા સપ્લાય કરતો હતો. મુંબઈમાં જીગ્નેશ ગાલા નામના વ્યક્તિને સપ્લાય કરતો હતો. પોલીસે ટીમ બનાવી જીજ્ઞેશની શોધખોળ શરૂ કરી હતી. 1 ફેબ્રુઆરીએ આરોપીની મુંબઈના મલાડમાંથી ધરપકડ કરવામાં આવી હતી. તેમના કહેવા પર મારુતિ ઈકો વાનમાંથી રૂ. 9.46 લાખના નકલી સિક્કા મળી આવ્યા હતા. આરોપીએ જણાવ્યું કે પહેલા તે બેંકોમાંથી સિક્કા અને નોટો લાવતો હતો અને વેપારીઓને સપ્લાય કરતો હતો. તેમની ભારે માંગ જોઈને તેણે નકલી સિક્કા સપ્લાય કરતા લોકો પાસેથી સિક્કા લેવાનું શરૂ કર્યું. કોઈ તેમની તપાસ કરતું ન હોવાથી, તેમને બજારમાં ચલાવવામાં કોઈ મુશ્કેલી ન હતી. આરોપીએ કહ્યું કે તે જયપુરથી સામાન ઉપાડીને મુંબઈ લાવતો હતો. તે દર વખતે લગભગ 10 લાખના સિક્કા લાવતો હતો. તે 15 થી 20 વખત 10-10 લાખના સિક્કા લાવ્યા છે. પોલીસે તેની પૂછપરછ કરતા ગેંગના બાકીના સભ્યોને શોધી રહી છે.
