કેનેડા અને અમેરિકાના ઘણા રાજ્યોમાં ઠંડીનો પારો માઇન્સ 17 ડિગ્રીથી પણ નીચે પહોંચશે
અમેરિકા અને કેનેડાના લગભગ 100 મિલિયન લોકો આ દિવસોમાં ઉત્તર અમેરિકામાં સખત શિયાળાનો સામનો કરી રહ્યા છે. દેશના હવામાન વિભાગે ખૂબ જ કોલ્ડ વેવની આગાહી કરી છે અને કહ્યું છે કે આ કોલ્ડ વેવના કારણે ત્વચા અથવા ક્યારેક ત્વચાની નીચેની પેશીઓ જામી જવાનો ભય રહે છે અને જેની માનવ શરીર પર ખરાબ અસર પડે છે.
આ પણ વાંચો : અમેરિકામાં જાસૂસી બલૂન દેખાયા બાદ વિદેશમંત્રી એન્ટની બ્લિંકને બેઇજિંગની મુલાકાત મુલતવી
હવામાન વિભાગે કેનેડાના મેનિટોબા પ્રાંતથી યુએસ પ્રાંત મૈનેના રહેવાસીઓને શુક્રવાર અને શનિવારે જરૂર સિવાય ઘરની બહાર ન નીકળવા ચેતવણી આપી છે. આ સાથે અમેરિકામાં ખરાબ હવામાનને કારણે સોમવારથી અત્યાર સુધીમાં 11 લોકોના મોત થયા છે. ટેક્સાસમાં આઠ, ઓક્લાહોમામાં બે અને અરકાનસાસમાં એકનું મોત થયું છે.
તાપમાનમાં આ ઘટાડા માટે આર્કટિક પ્રદેશમાંથી આવતી ઠંડી હવા જવાબદાર હોવાનું માનવામાં આવી રહ્યું છે. અમેરિકાના ઘણા રાજ્યોમાં શુક્રવાર બપોર સુધીમાં ઘણા રેકોર્ડ તૂટી જવાની અપેક્ષા છે, જ્યાં કુલ 8.2 લાખ લોકોને માઈનસ 17 ડિગ્રી સેલ્સિયસ અથવા તેનાથી ઓછા તાપમાનનો સામનો કરવો પડી શકે છે. મૈને પ્રાંતના કેટલાક ભાગોમાં 1971 પછીનું સૌથી નીચું તાપમાન નોંધાય તેવી શક્યતાઓ છે. પોર્ટલેન્ડ શહેરમાં પણ તાપમાન માઈનસ 40.5 ડિગ્રી સેલ્સિયસ સુધી પહોંચવાની ધારણા છે.
