EDએ શારદા મની લોન્ડરિંગ કેસમાં નલિની ચિદમ્બરમ, CPI(M)ના ભૂતપૂર્વ ધારાસભ્ય દેવેન્દ્રનાથ બિસ્વાસ અને અન્યની મિલકતો જપ્ત કરી હતી. નલિની ચિદમ્બરમ કોંગ્રેસના વરિષ્ઠ નેતા અને પૂર્વ નાણામંત્રી પી ચિદમ્બરમની પત્ની છે. ઇડીએ કહ્યું કે તેણે શારદા મની લોન્ડરિંગમાં ભૂતપૂર્વ કેન્દ્રીય નાણામંત્રી અને કોંગ્રેસ નેતા પી ચિદમ્બરમની પત્ની નલિની ચિદમ્બરમ, ભૂતપૂર્વ સીપીએમ ધારાસભ્ય દેવેન્દ્રનાથ બિસ્વાસ અને આસામના ભૂતપૂર્વ પ્રધાન સ્વર્ગસ્થ અંજન દત્તાની કંપની જેવા “લાભાર્થીઓ” પાસેથી 6 કરોડ રૂપિયાથી વધુની વસૂલાત કરી છે.
એજન્સીએ એક નિવેદનમાં જણાવ્યું છે કે પ્રિવેન્શન ઓફ મની લોન્ડરિંગ એક્ટ (PMLA) હેઠળ રૂ. 3.30 કરોડની જંગમ સંપત્તિ અને રૂ. 3 કરોડની સ્થાવર સંપત્તિને જપ્ત કરવાનો કામચલાઉ આદેશ જારી કરવામાં આવ્યો છે. આ મિલકતો શારદા જૂથ અને અન્ય લોકોની માલિકીની હતી, જેઓ જૂથ વતી “ગુનાની આવક”ના લાભાર્થી હતા.
EDએ શું કહ્યું?
EDએ જણાવ્યું હતું કે “લાભાર્થીઓ”માં નલિની ચિદમ્બરમ, દેવબ્રત સરકાર, દેવેન્દ્રનાથ બિસ્વાસ અને આસામના ભૂતપૂર્વ કેબિનેટ મંત્રી અને કોંગ્રેસના નેતા અંજન દત્તાની માલિકી ધરાવતા અનુભૂતિ પ્રિન્ટર્સ એન્ડ પબ્લિકેશન્સનો સમાવેશ થાય છે. મની લોન્ડરિંગ કેસ 2013માં પશ્ચિમ બંગાળ, આસામ અને ઓડિશામાં શારદા જૂથ દ્વારા કથિત ચિટ ફંડ કૌભાંડ સાથે સંબંધિત છે.
અત્યાર સુધીમાં 600 કરોડની સંપત્તિ જપ્ત
EDએ જણાવ્યું હતું કે આ ગ્રૂપ કંપની દ્વારા એકત્ર કરવામાં આવેલી કુલ રકમ લગભગ રૂ. 2,459 કરોડ છે, જેમાંથી વ્યાજની રકમને બાદ કરતાં થાપણદારો પર લગભગ રૂ. 1,983 કરોડ હજુ પણ બાકી છે. એન્ફોર્સમેન્ટ ડિરેક્ટોરેટે આ કેસમાં અત્યાર સુધીમાં રૂ. 600 કરોડની સંપત્તિ જપ્ત કરી છે.
