આરોગ્ય ટીમ : રાષ્ટ્રીય બાળ સ્વાસ્થ્ય કાર્યક્રમ અંતર્ગત 88 લાખથી વધુ બાળકોનું કરવામાં આવ્યું સ્વાસ્થ્ય સ્ક્રીનીંગ

ગુજરાત : શાળા આરોગ્ય – રાષ્ટ્રીય બાળ સુરક્ષા કાર્યક્રમ અંતર્ગત રાજ્યમાં એપ્રિલ-2022 થી 19 જાન્યુઆરી 2023માં સુધીમાં રાજ્યના 88 લાખ 49 હજાર 809 બાળકોની સ્વાસ્થ્ય સંબંધિત આરોગ્ય તપાસ – સ્ક્રીનીંગ કરવામાં આવી છે.આરોગ્ય ટીમ દ્વારા છેલ્લા 8 મહિનામાં દર મહિને 11 લાખ જેટલા બાળકોની આરોગ્ય તપાસ કરવામાં આવી છે.

શાળા આરોગ્ય-રાષ્ટ્રીય બાળ સ્વાસ્થ્ય કાર્યક્રમ અંતર્ગત કરવામાં આવતા સ્ક્રીનીંગ પ્રક્રિયામાં બનાસકાંઠા જિલ્લામાં સૌથી વધું 6 લાખ 47 હજાર 502 બાળકોનું સ્ક્રીનીંગ કરવામાં આવ્યું છે. રાજ્ય આરોગ્ય વિભાગ દ્વારા મળતી માહિતી અનુસાર ખેડા જિલ્લામાં 4.64 લાખ,સુરત કોર્પોરેશનમાં 4.53 લાખ,કચ્છમાં 4.44 લાખ, અમદાવાદ કોર્પોરેશનમાં 3.92 લાખ, મહેસાણામાં 3.90 લાખ,આણંદમાં 3.87 લાખ , રાજકોટમાં 3.27 લાખ બાળકોનું સ્ક્રીનીંગ કરવામાં આવ્યું છે. રાજ્યાના કેટલાક જિલ્લાઓએ ઉત્તમ પ્રદર્શન કરીને સ્ક્રીનીંગના નિર્ધારિત લક્ષ્યાંકના 100 ટકા થી વધુ પુર્ણ કર્યા છે. જેમાં સુરત જિલ્લામાં સર્વશ્રેષ્ઠ 165 ટકા કામગીરી થઇ છે.

કિડની, લીવર અને બોનમેરો ટ્રાન્સપ્લાન્ટ જેવી ખર્ચાળ સર્જરી પણ આ યોજના અંતર્ગત સંપૂર્ણપણે નિ:શુલ્ક ઉપલ્ધ કરાઇ

બાળકોને 4D  ( બર્થ ડિફેક્ટ, ડેવપલમેન્ટલ ડીલે, ડીસીઝ અને ડેફીસીઅન્સી) માટે મોબાઇલ હેલ્થ ટીમ દ્વારા ચકાસણી કરવામાં આવે છે. રાજ્યના 88.49 લાખ સ્ક્રીનીંગ થયેલ બાળકોમાંથી 3195 જેટલા બાળકોમાં કિડની, હ્રદય, કેન્સર જેવી વિવિધ બિમારીઓનું નિદાન થયું હતુ. જેની સફળતાપૂર્વક સારવાર આપવામાં આવી છે. જેમાં 2110 બાળકોની હ્રદયરોગ સંબધિત સારવાર, 724 કિડનીની સારવાર, 337 કેન્સરની સારવાર આપવામાં આવી છે.13 બાળકોના કીડની ટ્રાન્સપ્લાન્ટ, 10 બાળકોના બોનમેરો ટ્રાન્સપ્લાન્ટ અને 1 બાળકના લીવર ટ્રાન્સપ્લાન્ટની સારવાર પણ આ યોજના અંતર્ગત સમાવિષ્ટ કરીને બાળકોને લાભ આપવામાં આવ્યો છે.

અત્રે ઉલ્લેખનીય છે કે, શાળા આરોગ્ય-રાષ્ટ્રીય બાળ સ્વાસ્થ્ય કાર્યક્રમ અંતર્ગત રાજયના 0 થી 18 વર્ષના તમામ બાળકોનું સ્વાસ્થ્ય અને આરોગ્ય જળવાઇ રહે તે હેતુસર બાળકોની આરોગ્ય તપાસણી અને સારવાર અને રેફરલ સેવાઓ જેવી ઉમદા અને ગણવતા સભર સેવાઓ રાજય સરકાર તરફથી પુરી પાડવામાં આવે છે.

શાળા આરોગ્ય – રાષ્ટ્રીય બાળ સુરક્ષા કાર્યક્રમ હેઠળ નિર્ધારીત પ્લાન મુજબ નવજાત શિશુ થી 6 વર્ષના આંગણવાડીના બાળકો, ધો.1 થી 12 માં અભ્યાસ કરતાં તમામ વિદ્યાર્થીઓ, 18 વર્ષ સુધીના શાળાએ જતાં અને ન જતાં બાળકો, આશ્રમશાળા, મદ્રેસા, ચિલ્ડ્રન હોમના બાળકોને આર.બી.એસ.કે. મોબાઇલ હેલ્થ ટીમ દ્વારા નિયમિત રીતે તમામ બાળકોની આરોગ્ય ચકાસણી અને સંદર્ભ સેવા દ્વારા સારવાર પુરી પાડવામાં આવે છે.

રાજ્યમાં 1000 જેટલી RBSK મોબાઇલ હેલ્થ ટીમ કાર્યરત

રાજ્યમાં કુલ 1000 જેટલી RBSK(રાષ્ટ્રીય બાળ સુરક્ષા કાર્યક્રમ) મોબાઇલ હેલ્થ ટીમો કાર્યરત છે.દરેક ટીમમાં બે આયુષ ડોક્ટર (મેલ અને ફિમેલ) એક ફાર્માસીસ્ટ અને એક સ્ત્રી આરોગ્ય કાર્યકરનો સમાવેશ થાય છે.

આ પણ વાંચો :  વડાપ્રધાન મોદીએ નવા વર્ષમાં 71 હજાર યુવાનોને આપી ભેટ, રોજગાર મેળા હેઠળ આપ્યા નિમણુક પત્ર