પાલનપુર : ડીસાના વાહરા ગામે દૂધ ઢોળાઈ જવાના મામલે યુવકની હત્યા
- પેટના ભાગે છરીના આડેધડ ઘા મારી લોહી લુહાણ કરી નાખ્યો હતો
- પિતા – પુત્ર સામે તેનો ગુનો નોંધાયો
પાલનપુર : ડીસા તાલુકાના ભીલડી પાસે આવેલ વાહરા ગામે દૂધની બરણી ને પગ અડી જતા દૂધ ઢળી જતા એક વ્યક્તિની પિતા-પુત્ર એ હત્યા કરી હોવાની ઘટના સામે આવી છે. જે મામલે ભીલડી પોલીસે હત્યા કરનાર પિતા પુત્ર સામે ફરિયાદ નોંધી વધુ કાર્યવાહી હાથ ધરી છે.
ડીસા તાલુકાના ભીલડી પાસે આવેલ વાહરા ગામે રહેતા અઠવાડિયા અગાઉ મેરુજી રાધુજી ઠાકોર બીડી લેવા માટે ગામમાં આવેલ ભૂરાજી પરબતજી ઠાકોર ના ગલ્લા પર ગયા હતા. તે સમયે ત્યાં આવેલા ભુરાજી ઠાકોર ની દૂધની બરણી ને પગ અડી જતા દૂધ ઢોળાઈ જતા બંને વચ્ચે બોલાચાલી થઈ હતી અને ઉશ્કેરાયેલા ભુરાજીએ મેરુજીને માથાના ભાગે બરણી મારી ગંભીર ઈજા પહોંચાડતા તેઓ પોતાના ઘરે પહોંચ્યા હતા.
જ્યા ઇજાગ્રસ્ત મેરુજીના ભાઈ શ્રવનજી રાધુજી ઠાકોર તરત જ તેમને લઈ હોસ્પિટલ તરફ જવા નીકળ્યા હતા. તે દરમ્યાન રસ્તામાં ભુરાજી ઠાકોર અને તેના પિતા પરબતજી અમથાજી ઠાકોરે ફરી છરી અને લાકડી વડે હુમલો કરી મેરુજી ના પેટના ભાગે છરી ના આડેધડ ઘા મારી લોહી લુહાણ કરી નાસી ગયા હતા.બાદમાં ગંભીર રીતે ઇજાગ્રસ્ત મેરુજી ને સારવાર અર્થે ડીસાની સરકારી હોસ્પિટલ અને ત્યારબાદ વધુ સારવાર માટે પાલનપુર ખસેડ્યા હતા. જ્યાં સારવાર દરમિયાન તેમનું મોત નીપજ્યું હતું. જે મામલે ભીલડી પોલીસે પિતા પુત્ર સામે ગુન્હો નોંધી વધુ તપાસ હાથ ધરી છે.
આ પણ વાંચો : પાલનપુર : વડગામમાં મજબુર વ્યકિતઓના ચેક રિર્ટન કરાવી તગડું વ્યાજ વસૂલનારા વ્યાજખોર સાળા – બનેવી ઝડપાયા
