USA : પૂર્વ રાષ્ટ્રપતિ ડોનાલ્ડ ટ્રમ્પ પર બળાત્કારનો આરોપ, કોર્ટમાં પીડિતાને આપી ધમકી

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ પર એક લેખિકાએ 90ના દાયકામાં તેના પર બળાત્કાર કરવાનો આરોપ લગાવ્યો હતો. જે બાદ પીડિતાએ ટ્રમ્પ વિરુદ્ધ કોર્ટમાં કેસ પણ દાખલ કર્યો છે. આ જ કેસની જુબાની નોંધતી વખતે ડોનાલ્ડ ટ્રમ્પે પીડિતાનું અપમાન કર્યું હતું અને તેની સામે કેસ દાખલ કરવાની ધમકી પણ આપી હતી. ઉલ્લેખનીય છે કે, એલે મેગેઝીનના કટારલેખક ઈ.જીન કેરોલે ડોનાલ્ડ ટ્રમ્પ પર રેપનો આરોપ લગાવ્યો હતો. જુબાની દરમિયાન ટ્રમ્પે કહ્યું હતું કે ‘તે કહી રહી છે કે મેં કંઈક કર્યું પરંતુ આવું ક્યારેય બન્યું નથી’. મને આ બાબતની પણ ખબર નથી.

ટ્રમ્પે પીડિતાના વકીલ સાથે પણ ઘર્ષણ કર્યું હતું

આ કેસમાં પીડિતાના વકીલ રોબર્ટા કેપ્લાન સાથે પણ ટ્રમ્પની ટક્કર થઈ હતી. આ દરમિયાન બંને વચ્ચે ઉગ્ર બોલાચાલી થઈ હતી. ટ્રમ્પે પીડિત કેરોલને કાવતરાખોર ગણાવી હતી અને દાવો કર્યો હતો કે તેની સામે ખોટો કેસ કરવામાં આવ્યો છે. ટ્રમ્પે વકીલ રોબર્ટાને કહ્યું કે “જ્યારે આ કેસ પૂરો થશે, ત્યારે હું તેના પર કેસ કરીશ અને હું તમારા પર કેસ કરીશ.”

ટ્રમ્પે પીડિતાને માનસિક રીતે બીમાર પણ ગણાવી

પીડિતા, કટારલેખક કેરોલે 2019 માં પ્રકાશિત એક પુસ્તકમાં દાવો કર્યો હતો કે ટ્રમ્પે 90 ના દાયકાના મધ્યમાં મેનહટન ડિપાર્ટમેન્ટલ સ્ટોરમાં તેની સાથે બળાત્કાર કર્યો હતો. જોકે ટ્રમ્પનું કહેવું છે કે આવી કોઈ ઘટના બની નથી. ટ્રમ્પે એમ પણ કહ્યું કે ‘તે તેના પ્રકારની નથી.’ ટ્રમ્પે દાવો કર્યો હતો કે “તે મારા પર બળાત્કારનો આરોપ લગાવી રહી છે પરંતુ મને એ પણ ખબર નથી કે તે કોણ છે.” ટ્રમ્પે પીડિતાને માનસિક રીતે બીમાર પણ ગણાવી હતી.

ટ્રમ્પે યુએસ પ્રમુખપદની રેસમાં સામેલ થવાની કરી જાહેરાત

ડોનાલ્ડ ટ્રમ્પે મંગળવારે ત્રીજી વખત યુએસ પ્રમુખપદની રેસમાં સામેલ થવાની જાહેરાત કરી છે. જોકે, આ જાહેરાત એવા સમયે કરવામાં આવી છે જ્યારે અમેરિકામાં મધ્યસત્ર ચૂંટણીમાં ડોનાલ્ડ ટ્રમ્પની રિપબ્લિકન પાર્ટીનું પ્રદર્શન ખરાબ રહ્યું છે. આ ઉપરાંત, ટ્રમ્પ તેમની સામે બળાત્કારના આરોપો અને માર એ લાગો ક્લબ સહિત અન્ય ઘણા કેસોમાં કાનૂની કાર્યવાહીનો સામનો કરી રહ્યા છે.