રશિયાના રાષ્ટ્રપતિ વ્લાદિમીર પુતિને યુક્રેનમાં બે દિવસીય યુદ્ધવિરામનો આદેશ આપ્યો હતો. પુતિને આવતીકાલથી બે દિવસીય યુદ્ધવિરામનો આદેશ આપ્યો છે. આ યુદ્ધવિરામ 6 અને 7 જાન્યુઆરીએ લાગુ થશે. પુતિને કરેલા આદેશની વિશ્વભરમાં ચર્ચાઓ થઈ રહી છે ત્યારે તેમના આ નિર્ણયની વિશ્વભરે પ્રશંસા કરી છે.
શા માટે આ પ્રકારનો આદેશ કરાયો ?
મળતી માહિતી મુજબ પુતિને યુક્રેન સાથે 36 કલાકના યુદ્ધવિરામની જાહેરાત કરી છે. ઓર્થોડોક્સ ક્રિસમસને ધ્યાનમાં રાખીને આ આદેશ જારી કરવામાં આવ્યો છે. ખરેખર, રશિયાના ઓર્થોડોક્સ ચર્ચના વડા દ્વારા પુતિનને અપીલ કરવામાં આવી હતી. આ પછી જ પુતિને આ જાહેરાત કરી છે.જો કે યુક્રેને તેને છેતરપિંડી ગણાવી છે. ક્રેમલિન તરફથી કહેવામાં આવ્યું છે કે પુતિને 36 કલાકના યુદ્ધવિરામનો આદેશ આપ્યો છે. યુદ્ધવિરામ 6 જાન્યુઆરીએ બપોરે 12 વાગ્યાથી શરૂ થશે. રશિયા અને યુક્રેનમાં રહેતો એક મોટો વર્ગ 6-7 જાન્યુઆરીએ નાતાલની ઉજવણી કરે છે.
વિશ્વના અનેક દેશોએ કરી છે યુદ્ધ વિરામની અપીલ
રશિયાએ 24 ફેબ્રુઆરીએ તેના પાડોશી દેશ યુક્રેન પર હુમલો કર્યો હતો. લગભગ 10 મહિનામાં આ યુદ્ધમાં હજારો લોકો માર્યા ગયા છે. લાખો લોકોને વિસ્થાપિત થવું પડ્યું છે. ભારત સહિત ઘણા દેશોએ રશિયા અને યુક્રેન બંનેને વાતચીત દ્વારા આ મુદ્દાનો ઉકેલ લાવવાની અપીલ કરી છે.
