ચૌટાલાને 4 વર્ષની જેલઃ અપ્રમાણસર સંપત્તિનો કેસ, 50 લાખનો દંડ
હરિયાણાના પૂર્વ મુખ્યમંત્રી ઓમ પ્રકાશ ચૌટાલાને અપ્રમાણસર સંપત્તિના કેસમાં કોર્ટે ચાર વર્ષની જેલ અને 50 લાખનો દંડ ફટકાર્યો છે. ઉલ્લેખનીય છે કે ચૌટાલાએ પોતાની બિમારી અને કેસ જૂનો હોવાને કારણે સહાનુભૂતિની વિનંતી કરી હતી. સાથે જ સીબીઆઈએ કહ્યું હતું કે ભ્રષ્ટાચાર એ સમાજ માટે કેન્સર સમાન છે, ભ્રષ્ટાચારના મામલામાં કોર્ટે એવી સજા આપવી જોઈએ જેથી કરીને સમાજમાં એક દાખલો બેસાડી શકાય.
ચૌટાલાને જવું પડશે જેલ
કોર્ટે ઓમ પ્રકાશ ચૌટાલાને ત્રણ વર્ષથી વધુની સજા સંભળાવી છે, તેથી તેમને જેલમાં જવું પડશે. જોકે, તે જામીન માટે દિલ્હી હાઈકોર્ટમાં અપીલ કરી શકે છે જ્યાંથી તેમને રાહત મળી શકે છે. પિતાને ચાર વર્ષની સજા થયા બાદ પુત્ર અભય ચૌટાલાએ કહ્યું કે, “અમે આ નિર્ણય સામે દિલ્હી હાઈકોર્ટમાં જઈશું. આગામી બે દિવસમાં અમારા વકીલની સલાહ લીધા બાદ અમે સોમવાર અથવા મંગળવાર સુધીમાં હાઇકોર્ટમાં અપીલ કરીશું.”
Former Haryana CM Om Prakash Chautala gets 4 years jail in disproportionate assets case
Read @ANI Story | https://t.co/QdptOyngJW#OPChautala #Disproportionateassetscase #Haryana pic.twitter.com/9ujil7njBX
— ANI Digital (@ani_digital) May 27, 2022
શું છે સમગ્ર મામલો?
CBI દ્વારા દાખલ કરવામાં આવેલી ચાર્જશીટ મુજબ, ચૌટાલા 1993 અને 2006 વચ્ચે 6.09 કરોડ રૂપિયા (તેમની કાયદેસરની આવકના સ્ત્રોત કરતાં વધુ)ની સંપત્તિ એકત્ર કરવા માટે જવાબદાર છે. મે 2019માં EDએ 3.6 કરોડ રૂપિયાથી વધુની સંપત્તિ જપ્ત કરી હતી. ચૌટાલાને જાન્યુઆરી 2013માં જેબીટી કૌભાંડમાં પણ દોષિત ઠેરવવામાં આવ્યા હતા. 2008માં, ચૌટાલા અને અન્ય 53 લોકો પર હરિયાણામાં 1999થી 2000 દરમિયાન 3,206 જુનિયર મૂળભૂત પ્રશિક્ષિત શિક્ષકોની નિમણૂકને લઈ આરોપ લગાવવામાં આવ્યા હતા. જાન્યુઆરી 2013માં કોર્ટે ઓમ પ્રકાશ ચૌટાલા અને તેમના પુત્ર અજય સિંહ ચૌટાલાને ભ્રષ્ટાચાર નિવારણ અધિનિયમ હેઠળ 10 વર્ષની જેલની સજા ફટકારી હતી. ચૌટાલાને ગેરકાયદેસર રીતે 3,000 અયોગ્ય શિક્ષકોની ભરતી કરવા બદલ દોષી ઠેરવવામાં આવ્યા હતા.
ચૌટાલાના વકીલની દલીલો કામ ન લાગી
ચૌટાલા તરફથી હાજર રહેલા એડવોકેટ હર્ષ શર્માએ રાઉઝ એવન્યુ કોર્ટમાં વિશેષ ન્યાયાધીશ વિકાસ ધુલ સમક્ષ રજૂઆત કરી હતી કે તેમનો અસીલ શારીરિક રીતે વિકલાંગ છે અને અસ્થમા છે. આ કેસમાં તે જેલમાં છે અને તેની હાલની ઉંમર 87 વર્ષની છે. તેઓ 90 ટકા વિકલાંગ છે અને કોઈની મદદ વિના ક્યાંય પણ જઈ શકતા નથી. ચૌટાલાને સ્વાસ્થ્ય સંબંધિત ઘણી બિમારીઓ છે અને તેઓ ગુડગાંવના મેદાંતામાં પણ તેમની સારવાર ચાલી રહી છે. તેમને હ્રદયની બીમારી પણ છે અને પેસમેકર પણ ફીટ કરેલ છે. કોર્ટમાં તેમના મેડિકલ હિસ્ટ્રી વિશે માહિતી આપતાં ચૌટાલાના વકીલે કહ્યું કે ચૌટાલાના ફેફસામાં પણ ઈન્ફેક્શન છે, જેની સારવાર ચાલી રહી છે.
સુપ્રીમ કોર્ટના નિર્ણયનો ઉલ્લેખ કરતા તેમણે કહ્યું કે જો કોઈ આરોપી અક્ષમ હોય તો કોર્ટ માનવતાના આધારે ઓછી સજા આપવાનું વિચારી શકે છે. ચૌટાલાના વકીલે કહ્યું કે ચૌટાલા કેટલો સમય જેલમાં રહ્યા છે તે પણ સજા સંભળાવતી વખતે ધ્યાનમાં લેવો જોઈએ. સજા પર નિર્ણય આપતી વખતે કોર્ટે તેમના આવા ખરાબ સ્વાસ્થ્યનું પણ ધ્યાન રાખવું જોઈએ.
ચૌટાલાના વકીલે કહ્યું કે ઓપી ચૌટાલા પર 1993-2006 દરમિયાન અપ્રમાણસર સંપત્તિ પ્રાપ્ત કરવાનો આરોપ છે. તેનો સમયગાળો 20 વર્ષથી વધુ છે. આ દરમિયાન તેણે હંમેશા તપાસમાં સહકાર આપ્યો છે. વકીલે કહ્યું કે ચૌટાલાનો જેલમાં સારો વ્યવહાર રહ્યો છે અને આ મામલામાં કોર્ટમાં પણ તેમણે ક્યારેય સુનાવણી મોકૂફ રાખવાની વિનંતી કરી નથી. કોર્ટની પ્રક્રિયામાં હંમેશા સહકાર આપ્યો છે.
CBIએ આ અંગે ઉઠાવ્યો હતો વાંધો
બચાવ પક્ષની દલીલો સામે વાંધો ઉઠાવતા CBIએ પૂર્વ મુખ્યમંત્રી ઓપી ચૌટાલાને મહત્તમ સજાની માંગ કરી હતી. CBIના વકીલે કહ્યું કે દોષિત સ્વાસ્થ્યના આધારે સજામાં ફેરફારની માંગ કરી શકે નહીં. ભ્રષ્ટાચાર ઘટાડવા માટે કાયદા મુજબ સજા થવી જોઈએ. દોષિતની પત્ની અને 2 મોટા બાળકો છે. કોઈ તેમના પર નિર્ભર નથી.
CBIના વકીલે કહ્યું કે, ભ્રષ્ટાચાર એ સમાજ માટે કેન્સર સમાન છે, ભ્રષ્ટાચારના મામલામાં કોર્ટે આવી સજા આપવી જોઈએ. જેથી કરીને સમાજમાં દાખલો બેસાડી શકાય. તેમણે કહ્યું કે ગુનેગારને સજા ઓછી થશે તો સમાજમાં ખોટો સંદેશ જશે. એટલું જ નહીં, ચૌટાલાને બીજી વખત દોષિત ઠેરવવામાં આવ્યા છે અને તેમની છબી સ્પષ્ટ નથી.
