નવી દિલ્હીઃ ભારત સરકાર કોરોનાને લઈને એલર્ટ પર છે. સરકારે ગયા અઠવાડિયે જ નેઝલ વેક્સિનને મંજૂરી આપી હતી. ટૂંક સમયમાં વેક્સિન ઉપલબ્ધ થશે. હવે સૂત્રો પાસેથી મળેલી માહિતી મુજબ નેઝલ વેક્સિનની કિંમત હજાર રૂપિયા હોઈ શકે છે. આમાં, વેક્સિનની મૂળ કિંમત 800 રૂપિયા હશે. GST અને હોસ્પિટલ ચાર્જ સહિત, તે 1000 રૂપિયામાં ઉપલબ્ધ થશે.
ભારત બાયોટેકની ઇન્ટ્રાનાસલ રસી iNCOVACC ને ગયા અઠવાડિયે ભારતના COVID-19 રસીકરણ કાર્યક્રમમાં સામેલ કરવામાં આવી હતી. ખાનગી હોસ્પિટલોને ભારત બાયોટેક તરફથી 800 રૂપિયામાં એક ડોઝ મળશે, આ સિવાય 5 ટકા જીએસટી પણ લાગશે.
18+ને આપવામાં આવશે નેઝલ વેક્સિન
વર્તમાનમાં ભારત બાયોટેકની કોવેક્સિન, સીરમ ઈન્સ્ટીટ્યૂટની કોવિશીલ્ડ અને કોવોવેક્સ, રશિયાની સ્પુતિનિક વી અને બાયોલોજિકલ ઈ લિમિટેડની કોર્બેવેક્સ વેક્સિન કોવિન પોર્ટલ પર લિસ્ટેડ છે. ભારત બાયોટેકે ગત 6 સપ્ટેમ્બરે જાહેરાત કરી હતી કે તેની દુનિયાની પહેલી ઈન્ટ્રાનેઝલ કોવિડ 19 વેક્સિન iNCOVACC (BBV154)ને DGCIએ 18 વર્ષ કે તેથી વધુ ઉંમર ધરાવતા લોકોને ઈમરજન્સી ઉપયોગ માટે મંજૂરી આપી છે.
કઈ રીતે આપવામાં આવે છે નેઝલ વેક્સિન
આ વેક્સિન નાક વડે સ્પ્રે કરીને આપવામાં આવે છે. એટલે વેક્સિન લેનારને ઈન્જેક્શન નથી મારવામાં આવતું. નેઝલ વેક્સિનના બે ડોઝ આપવામાં આવે છે. સૂત્રો દ્વારા મળતી માહિતી મુજબ રાજ્ય કે કેન્દ્ર સરકારે ખરીદવા માટે કોઈ અપીલ નથી કરી. બીજા દેશમાંથી મંજૂરી મળ્યા બાદ iNCOVACCને અન્ય દેશમાં વેક્સિનને એક્સપોર્ટ કરવાની યોજના છે. આ ઈન્ટ્રાનેઝલને ભારતમાં 18 વર્ષ અને તેનાથી વધુની ઉંમરના લોકો માટે બૂસ્ટર ડોઝ માટે ઈમરજન્સી ઉપયોગ સમયે CDSCOએ પણ મંજૂરી આપી દીધી છે. વેક્સિનને વોશિંગ્ટન યુનિવર્સિટી, સેન્ટ લુઈસની સાતે ભાગીદારીમાં વિકસિત કરવામાં આવી હતી.
શું નાકની રસીથી કોરોનાનું જોખમ ટળી જશે?
ભારત બાયોટેકની આ વેક્સિનનું ત્રણ વખત ટ્રાયલ કરવામાં આવ્યું છે. ખાસ વાત એ છે કે તે ત્રણેય ટ્રાયલમાં તે અસરકારક સાબિત થઈ છે. પ્રથમ તબક્કાના ટ્રાયલમાં 175 લોકો અને બીજા તબક્કાના ટ્રાયલમાં 200 લોકોને સામેલ કરવામાં આવ્યા હતા. આ પછી, ત્રીજા તબક્કામાં બે ટ્રાયલ થયા. પ્રથમમાં 3,100 અને બીજામાં 875 લોકો પર તેનો અલગ અલગ રીતે ઉપયોગ કરવામાં આવ્યો છે. એકમાં તે બે ડોઝની રસી તરીકે અને બીજીમાં બૂસ્ટર ડોઝ તરીકે આપવામાં આવી હતી.
રોગપ્રતિકારક શક્તિ વધારવામાં મદદ કરશે
વેક્સિનના ટ્રાયલ પછી, ભારત બાયોટેકે દાવો કર્યો હતો કે તે ખૂબ જ અસરકારક છે અને ઉપલા શ્વસન તંત્રમાં કોરોના સામે તમારી પ્રતિરક્ષા વધારવામાં મદદ કરશે. કોરોના સામે લડવા માટે, તમારી રોગપ્રતિકારક શક્તિ એટલી મજબૂત હોવી જોઈએ કે જેથી તમે શક્ય તેટલી વહેલી તકે કોરોનામાંથી સ્વસ્થ થઈ શકો.
રસી કેવી રીતે કામ કરે છે?
વાયરસ મોટાભાગે નાક દ્વારા તમારા શરીરમાં પ્રવેશે છે. આ રસી તમારી રોગપ્રતિકારક શક્તિને તમારા લોહીમાં અને તમારા નાકમાં પ્રોટીન બનાવે છે જેથી તમે સરળતાથી વાયરસ સામે લડી શકો. લગભગ બે અઠવાડિયા પછી તમારા શરીરમાં તેની અસર શરૂ થાય છે.
