બાબા રામદેવની દિવ્યા ફાર્મસી સહિત દવાની 16 ભારતીય કંપની બ્લેકલિસ્ટ, જાણો કોણે ભર્યું આ પગલું ?

ભારતની દવા કંપનીઓ માટે એક મોટો ઝટકો લાગતા સમાચાર સામે આવ્યા છે. જેમાં નેપાળે 16 ભારતીય ફાર્માસ્યુટિકલ કંપનીઓને બ્લેકલિસ્ટ કરી છે. આ પ્રતિબંધ આફ્રિકન દેશોમાં કફ સિરપના સંપર્કમાં આવેલા બાળકોના મૃત્યુ બાદ વર્લ્ડ હેલ્થ ઓર્ગેનાઇઝેશન (WHO)ની ચેતવણીને અનુસરે છે. નેપાળની મેડિસિન ઓથોરિટીએ આ સંદર્ભમાં એક યાદી બહાર પાડી છે. નેપાળ સરકાર દ્વારા બહાર પાડવામાં આવેલી આ યાદીમાં યોગગુરુ બાબા રામદેવની કંપની દિવ્યા ફાર્મસીનો પણ સમાવેશ થાય છે, આ કંપની પતંજલિ બ્રાન્ડ નામથી ઉત્પાદનો બનાવે છે.

કઈ કઈ કંપનીઓને બ્લેકલિસ્ટ કરાઈ ?

ડ્રગ રેગ્યુલેટરી ઓથોરિટી ઓફ નેપાળ દ્વારા જારી કરાયેલી યાદીમાં નામ આપવામાં આવેલી 16 ભારતીય ફાર્માસ્યુટિકલ કંપનીઓનો સમાવેશ થાય છે રેડિયન્ટ પેરેન્ટેરલ્સ લિમિટેડ, મર્ક્યુરી લેબોરેટરીઝ લિમિટેડ, એલાયન્સ બાયોટેક, કેપ્ટબ બાયોટેક, એગ્લોમેટ લિમિટેડ, ઝી લેબોરેટરીઝ લિમિટેડ, ડેફોડિલ્સ ફાર્માસ્યુટિકલ્સ લિમિટેડ, જીએલયુએસ ફાર્માસ્યુટિકલ્સ લિમિટેડ, જીએલયુએસ ફાર્મા લિમિટેડ. લિ. અને કોન્સેપ્ટ ફાર્માસ્યુટિકલ્સ પ્રાઇવેટ લિમિટેડ વગેરે. આ સિવાય આનંદ લાઈફ સાયન્સ લિમિટેડ, આઈપીસીએ લેબોરેટરીઝ લિમિટેડ, કેડિલા હેલ્થકેર લિમિટેડ, ડાયલ ફાર્માસ્યુટિકલ્સ, એગ્લોમેડ લિમિટેડ અને મેકર લેબોરેટરીઝ લિમિટેડ જેવી મોટી કંપનીઓ પણ આ યાદીમાં સામેલ છે. નેપાળના અધિકારીઓના જણાવ્યા અનુસાર, આ કંપનીઓ WHO દ્વારા નિર્ધારિત ધોરણોનું પાલન કરવામાં નિષ્ફળ રહી છે. આ કારણોસર તેમને નેપાળમાં બ્લેકલિસ્ટ કરવામાં આવ્યા છે.

નેપાળના અધિકારીઓનું શું નિવેદન આવ્યું ?

આ અંગે નેપાળના ડ્રગ રેગ્યુલેટરી ઓથોરિટીના સંતોષ કેસીએ જણાવ્યું હતું કે ફાર્માસ્યુટિકલ કંપનીઓની ઉત્પાદન સુવિધાઓનું નિરીક્ષણ કર્યા પછી, અમે નેપાળમાં દવાની નિકાસ કરતી કંપનીઓની યાદી બહાર પાડી છે જે WHO દ્વારા નિર્ધારિત ધોરણોનું પાલન કરવામાં નિષ્ફળ રહી છે. એપ્રિલ અને જુલાઈ મહિનામાં આ ફાર્માસ્યુટિકલ કંપનીઓના ઉત્પાદન એકમોનું નિરીક્ષણ કરવા માટે નેપાળથી ડ્રગ ઈન્સ્પેક્ટરોની એક ટીમ મોકલવામાં આવી હતી. આ તપાસ દરમિયાન જાણવા મળ્યું હતું કે આ કંપનીઓનું ઉત્પાદન નિર્ધારિત ધોરણોનું પાલન કરતું નથી. કેટલીક કંપનીઓમાં યોગ્ય ઉત્પાદન પ્રક્રિયાનું પણ પાલન કરવામાં આવતું નથી. આ ઉત્પાદનોનો ઉપયોગ ક્રિટિકલ કેર, ડેન્ટલ કારતુસ અને રસીમાં થાય છે.

ભારતીય કફ સિરપથી 66 બાળકોના મોત થયા હતા

ઉલ્લેખનીય છે કે, ભારતમાં બનેલી કફ સિરપ પીવાથી ગામ્બિયામાં 66 બાળકોના મોત બાદ વર્લ્ડ હેલ્થ ઓર્ગેનાઈઝેશને હરિયાણામાં ઉત્પાદિત ચાર કફ સિરપ અંગે એલર્ટ જાહેર કર્યું હતું. એવો દાવો કરવામાં આવ્યો હતો કે મેડન ફાર્માસ્યુટિકલ્સ દ્વારા ઉત્પાદિત કફ સિરપ પીવાથી બાળકોના મોત થયા હતા.