9 સ્ટોરી, 9 સુપરસ્ટાર અને 8 લેજેન્ડરી ફિલ્મમેકર: સાઉથની આ સીરિઝના ટ્રેલરે ચાહકોના જીત્યા દિલ
- ચાહકોએ સીરિઝનું ટ્રેલર જોઈને કહ્યું, “બ્લોકબસ્ટર માસ્ટરપીસ”
HD ન્યૂઝ ડેસ્ક, 16 જુલાઇ: આગામી મલયાલમ એન્થોલોજી(Anthology) સીરિઝ ‘મનોરથંગલ’નું પ્રથમ ઓફિશિયલ ટ્રેલર રિલીઝ કરવામાં આવ્યું છે, જે જ્ઞાનપીઠ પુરસ્કાર વિજેતા લેખક અને પટકથા લેખક-નિર્દેશક એમ.ટી.વાસુદેવન નાયરના જન્મદિવસ પર રિલીઝ કરવામાં આવ્યું હતું. નાયર દ્વારા લખાયેલી આ સિરીઝમાં એક નહીં, બે નહીં પરંતુ 9 સુપરસ્ટાર જોવા મળવાના છે. જેમાં સુપરસ્ટાર મામૂટી, મોહનલાલ, ફહાદ ફાસિલ, કમલ હાસન, પાર્વતી થિરુવોથુ અને મધુ જેવા ઘણા મહાન કલાકારોના નામ સામેલ છે. ટ્રેલર રિલીઝ થયા પછી, ચાહકો તેને બ્લોકબસ્ટર માસ્ટરપીસ ગણાવી રહ્યા છે અને પ્રતિક્રિયા આપતા જોવા મળી રહ્યા છે.
ટ્રેલરની શરૂઆત હિન્દુસ્તાની 2 અભિનેતા અને ફિલ્મ નિર્માતા કમલ હાસન સાથે થાય છે જેમાં પ્રખ્યાત લેખક એમટીના વારસાની એક ઝલક આપવામાં આવે છે. જેમ જેમ 1 મિનિટ 46 સેકન્ડનું ટ્રેલર આગળ વધે છે, દર્શકોને સીરિઝના વિવિધ ભાગોના અવતરણો જોવા મળે છે. જેમાં મલયાલમ સુપરસ્ટાર મોહનલાલ અને મામૂટી ઉપરાંત ફહાદ ફાસિલ સહિત ઘણા કલાકારો જોવા મળે છે.
અહીં જૂઓ ટ્રેલર વીડિયો
એન્થોલોજી સીરિઝ મનોરથંગલ વિશે જાણો
ટ્રેલરમાં સ્પષ્ટપણે જોઈ શકાય છે કે, દરેક સ્ટોરી યુનિક છે. બધામાં સમયગાળો અને સ્થાન અલગ-અલગ જોવા મળે છે. સુપરસ્ટાર મોહનલાલના દ્રશ્યો ક્લાસિક બ્લેક એન્ડ વ્હાઇટમાં જોવા મળે છે. જ્યારે મામૂટી ખૂબ જ ઇન્ટેન્સ(Intense) લુકમાં જોવા મળે છે. ‘મનોરથંગલ’ એક કાવ્યસંગ્રહ(Anthology) છે, જેમાં નાયરની ટૂંકી વાર્તાઓ પર આધારિત નવ જુદા જુદા એપિસોડનો સમાવેશ કરવામાં આવ્યો છે. પ્રિયદર્શને બે એપિસોડનું નિર્દેશન કર્યું છે, જ્યારે શ્યામાપ્રસાદ, અશ્વથી વી. નાયર, મહેશ નારાયણન, રંજીત, સંતોષ સિવન અને રતીશ અંબત અન્ય ફિલ્મ નિર્માતા છે.
મામૂટી, મોહનલાલ, ફહાદ ફાસિલ, કમલ હાસન, પાર્વતી થિરુવોથુ અને મધુ ઉપરાંત, ‘મનોરથંગલ’માં બીજુ મેનન, ઈશિત યામીમી, અપર્ણા બાલમુરલી, નાધિયા મોઈદુ, એન ઓગસ્ટિન, દુર્ગા કૃષ્ણા, આસિફ અલી, ઈન્દ્રજીત સુકુમારન, ઈંદ્રાન્સ અને સિદ્દિકી જેવા સ્ટાર્સ જોવા મળે છે. આ સીરિઝ મલયાલમ, તમિલ, તેલુગુ, કન્નડ અને હિન્દીમાં 15 ઓગસ્ટના રોજ Zee5 પર રિલીઝ થશે.
આ પણ જૂઓ: અક્ષય કુમાર કોરોનામુક્ત: પત્ની ટ્વિંકલ ખન્ના સાથે અનંત-રાધિકાના રિસેપ્શનમાં પહોંચ્યો
