ફિલ્મી સ્ટોરીને પણ ટક્કર મારે તેવા બનાવ, દુષ્કર્મ,અપહરણ અને હત્યા મામલે સુરજ ભુવા સહિત 8ની ધરપકડ

ફિલ્મી સ્ટોરીને પણ ટક્કર મારે તેવી હત્યાની ઘટના સામે આવી છે. દુષ્કર્મનો ભોગ બનેલી યુવતીનું અપહરણ કરી હત્યા કરી દેવાની ઘટના સામે આવી છે. પોલીસે એક વર્ષ પહેલા થયેલ યુવતીની હત્યાનો ભેદ ઉકેલી કાઢ્યો છે. આ મામલે પોલીસે સુરજ સોલંકી (ભૂવાજી )એક મહિલા સહિત 8 લોકોની ધરપકડ કરી છે.

જૂનાગઢની યુવતીની હત્યાનો ચોંકાવનારો કેસ

આ મામલે અમદાવાદ ઝોન-7ના DCP બી.યુ જાડેજાએ વિગતો આપતા જણાવ્યું હતુ કે અમદાવાદ ખાતે રહેતી અને મૂળ જૂનાગઢની ધારા કડીવાર નામની યુવતી છેલ્લા એકાદ વર્ષથીગુમ થયાની ફરિયાદ પાલડી પોલીસ સ્ટેશનમાં નોંધાઈ હતી. જેને શોધી કાઢવા માટે પોલીસ દ્વારા ગંભીરતા પૂર્વક તપાસ હાથ ધરવામાં આવી હતી.આ તપાસમાં જાણવા મળ્યુ કે ધારા ગત 19 જૂનના રોજ જૂનાગઢના પોતાના ઘરેથી સુરજ ભુવાજી (સુરજ સોલંકી) અને મીત શાહની સાથે કારમાં અમદાવાદ આવવા નીકળી હતી. જોકે મીતના ઘરે આવ્યા બાદ અચાનક કોઈને કહ્યા વગર તે નીકળી ગઈ હોવાની અરજી સુરજ સોલંકીએ પાલડી પોલીસમાં આપી હતી. સુરજે પોલીસને જણાવ્યું હતું કે, ધારા પોતાનો સામાન લઈને મીતના ઘરેથી ચાલી ગઈ હતી, તેને મને વોટ્સએપ પર મેસેજ કરીને કહ્યું હતું કે, મને શોધવાની કોશિશ ન કરતા હું તમારા જીવનમાંથી હંમેશા માટે જાવ છું અને પોલીસના લફડામાં પણ પડતા નહીં. આ ઘટનાના એકાદ મહિના બાદ ધારાના ભાઈએ અરજી કરી હતી કે મારી બહેન છેલ્લે સુરજ ભુવાજીની સાથે નીકળી હતી, જે ગુમ થઈ ગઈ છે. તેનો કોઈ અતોપતો નથી. જેથી પોલીસ આ બાબતની તપાસ કરી રહી હતી.

પોલીસે સુરજ ભુવા સહિત 8 ની કરી ધરપકડ

ધારાના ગૂમ થવા બાબતે તપાસ કરતા જાણવા મળ્યુ કે ધારાને સુરજ અને મીત ચોટીલાની બાજુમાં આવેલા સુરજ સોલંકીના મૂળ ગામ વાટાવચ્છ ખાતે લઈ ગયા હતા. જ્યાં સુરજના ભાઈ યુવરાજ અને તેનો મિત્ર ગુંજન જોશીએ આવીને ધારા સાથે બોલાચાલી કરી હતી.આ દરમિયાન કારની પાછળની શીટમાં બેઠેલા મીત શાહે દુપટાથી ધારાને ગળાટૂપો દઈને હત્યા કરી નાખી હતી. અને આ હત્યા કરવામા અન્ય આરોપીઓએ પણ સાથ આપ્યો હતો. હત્યા બાદ ધારાના મૃતદેહને નજીકની અવાવરુ જગ્યાએ લઈ જઈ તેના પર પેટ્રોલ છાંટીને સળગાવી દીધો હતો. અને બાદમાં ધારા ફરાર થઈ હોવાનુ નાટક કર્યુ હતું. જેમાં મીતની માતા, મીતના ભાઈએ પણ સાથે આપ્યો હતો. જેથી આ કેસમાં પોલીસે સુરજ ભુવાજી અને તેના ભાઈ યુવરાજ, ગુંજન જોશી, મીત શાહ, મુકેશ સોલંકી , સંજય સોહલિયા, જુગલ શાહ , મોના શાહનામના આરોપીની ધરપકડ કરી છે.

 આ પણ વાંચો : અમદાવાદ : ધીરેન્દ્ર શાસ્ત્રીના કાર્યક્રમને લઈને કોકડું ગૂચવાયું, પોલીસે નથી આપી મંજુરી