ઓસ્ટ્રેલિયામાં માર્ગ અકસ્માતમાં 4 પંજાબીઓના મોત, શીખ ડ્રાઈવર પણ ઇજાગ્રસ્ત

ઓસ્ટ્રેલિયામાં એક માર્ગ અકસ્માતમાં પંજાબના 4 લોકોના મોતના મામલામાં કારના ડ્રાઈવરને ટ્રાયલનો સામનો કરવો પડશે. આરોપી ડ્રાઈવર પણ ભારતીય મૂળનો છે. મહત્વનું છે કે, ભોગ બનનાર ભારતીય મૂળના લોકો તેમના મિત્રના ઘરે જઈ રહ્યા હતા ત્યારે આ દુર્ઘટના બની હતી, જ્યારે તેમની કાર અન્ય વાહન સાથે અથડાઈ હતી. આ અકસ્માતમાં ચાર લોકોના ઘટનાસ્થળે જ મોત થયા હતા. ડ્રાઇવરને ગંભીર ઇજા થઇ હતી. ડ્રાઈવર હાલ હોસ્પિટલમાં સારવાર હેઠળ છે. પોલીસે કાર ચાલકને માર્ગ અકસ્માતના સંબંધમાં ખતરનાક ડ્રાઇવિંગના કેસમાં આરોપી બનાવ્યો છે.

મૃતકો અને ઇજાગ્રસ્તો પંજાબી જ

મળતી માહિતી મુજબ માર્ગ અકસ્માત 4 જાન્યુઆરીએ થયો હતો, જ્યારે કાર ચાલક હરિન્દર સિંહ ભારતીય મૂળના ચાર મુસાફરોને લઈને ઓસ્ટ્રેલિયાના વિક્ટોરિયા પ્રાંતના શેપાર્ટન શહેરમાં જઈ રહ્યો હતો. દરમિયાન તેમની ટોયોટા કાર ટ્રેલર સાથે અથડાઈ હતી. ટક્કર એટલી જોરદાર હતી કે કારમાં સવાર ચારેય મુસાફરોના ઘટનાસ્થળે જ મોત થયા હતા. શેપર્ટન પંજાબી સમુદાયના નેતા ધર્મી સિંહે આ ઘટનાની પુષ્ટિ કરતા કહ્યું કે ડ્રાઈવર અને કારમાં સવાર તમામ મુસાફરો પંજાબી હતા.

કારના મુસાફરોએ સીટ બેલ્ટ બાંધ્યો હતો કે કેમ ?

સમાચાર અનુસાર, અકસ્માતમાં માર્યા ગયેલા ચાર લોકોમાંથી ત્રણ કારની ટક્કર થતાંની સાથે જ નીચે પડી ગયા હતા. પોલીસ તપાસ કરી રહી છે કે અકસ્માત સમયે મુસાફરોએ સીટ બેલ્ટ પહેર્યો હતો કે કેમ ? વિક્ટોરિયા પોલીસનું કહેવું છે કે કારનો આગળનો ભાગ ટ્રેલરની બાજુમાં અથડાયો, જેના કારણે કારમાં સવાર ત્રણ મુસાફરો કારમાંથી નીચે પડી ગયા અને મૃત્યુ પામ્યા હતા. કારની આગળની સીટ પર બેઠેલા ચોથા યુવકનું પણ ઘટનાસ્થળે જ મોત થયું હતું. અકસ્માત બાદ નતાલિયાના રહેવાસી કાર ચાલકને હોસ્પિટલમાં લઈ જવામાં આવ્યો હતો, જ્યાં હરિન્દર સિંહની સારવાર ચાલી રહી છે.