યુવકના પેટની સર્જરી કરાવતાં 39 સિક્કા અને 37 ચુંબક નીકળ્યા, કારણ જાણી ચોંકી જશો

દિલ્હી, 27 ફેબ્રુઆરી: દેશની રાજધાની દિલ્હીમાં એક ચોંકાવનારો કિસ્સો પ્રકાશમાં આવ્યો છે. અહીં ડોક્ટરોએ સર્જરી કરીને યુવકના આંતરડામાંથી 39 સિક્કા અને 37 ચુંબક કાઢ્યા છે. મામલો દિલ્હીની સર ગંગારામ હોસ્પિટલનો છે. આ કેસ ત્યારે પ્રકાશમાં આવ્યો જ્યારે 26 વર્ષીય દર્દીને 20 દિવસથી વધુ સમયથી વારંવાર ઉલ્ટી અને પેટમાં દુખાવાની ફરિયાદ સાથે સર ગંગારામ હોસ્પિટલના ઈમરજન્સી વોર્ડમાં દાખલ કરવામાં આવ્યો હતો.

એક્સ-રે કર્યા બાદ ડોક્ટરો પણ ચોંક્યા

દર્દીના સંબંધીઓએ તેના પેટનો એક્સ-રે કરાવ્યો, જેમાં તેના પેટમાં સિક્કા અને ચુંબક જોવા મળ્યા. પેટના સીટી સ્કેનથી જાણવા મળ્યું કે સિક્કા અને ચુંબકનો ભારે ભાર આંતરડામાં અવરોધ પેદા કરી રહ્યો હતો. ડોક્ટરો દ્વારા દર્દીને સમજાવ્યા પછી દર્દી સર્જરી કરાવવા માટે તૈયાર થયો. ઓપરેશન બાદ દર્દીના પેટમાંથી 39 સિક્કા અને 37 મેગ્નેટ કાઢવામાં આવ્યા હતા.

દર્દી આટલા બધા સિક્કા અને ચુંબક કેવી રીતે ગળી ગયો?

પ્રાપ્ત માહિતી અનુસાર, યુવક માનસિક બિમારીથી પીડિત હોવાનું જાણવા મળ્યું છે. જ્યારે દર્દીને પૂછવામાં આવ્યું કે તે ચુંબક અને સિક્કા કેમ ગળી રહ્યો છે, તો તેણે કહ્યું કે તેને લાગે છે કે આ ધાતુઓમાં મોટી માત્રામાં ઝીંક છે અને જો તે તેને ગળી જશે તો તે સ્વસ્થ થઈ જશે. દર્દીના સંબંધીઓએ જણાવ્યું કે તે છેલ્લા કેટલાક અઠવાડિયાથી સિક્કા અને ચુંબક ખાતો હતો. દર્દીની માનસિક સારવાર પણ ચાલી રહી હતી.

દર્દીના પેટમાંથી રુપિયા 1,2,5 ના સિક્કા નીકળ્યા

ડોક્ટરોએ જણાવ્યું કે દર્દીના પેટમાંથી કુલ 39 સિક્કા (રૂ. 1, 2, 5 સિક્કા) અને 37 ચુંબક (હૃદય, ગોળાકાર, સ્ટાર, ગોળી અને ત્રિકોણ આકારના) કાઢવામાં આવ્યા હતા. સર્જરી પછી, દર્દી સાત દિવસ સુધી હોસ્પિટલમાં રહ્યો. જ્યારે તે સાત દિવસ પછી સ્વસ્થ થયો, ત્યારે તેને ઘરે જવાની મંજૂરી આપવામાં આવી હતી.

આ પણ વાંચો: મહિલાઓ દ્વારા આ લક્ષણો પર ધ્યાન આપવામાં ન આવે તો, ગર્ભાશય યોનિમાંથી બહાર આવી શકે છે

આ પણ વાંચો: તમારા બાળકને ટાંકણી, સિક્કા જેવી વસ્તુઓ મોઢામાં નાખવાની ટેવ છે? આ બે કિસ્સાઓ જરૂરથી વાંચો