ડેડીયાપાડાના નિગટ ગામ નજીક કાર-મોટરસાયકલ વચ્ચે અકસ્માત, એક જ પરિવારના 3 લોકોનાં મોત

ડેડીયાપાડાઃ રાજ્યમાં અકસ્માતના બનાવો છાસવારે સામે આવતા હોય છે. ત્યારે આજે વહેલી સવારે ડેડીયાપાડાના નિગટ ગામ પાસે મોટરસાઈકલ અને ફોરવ્હીલર વચ્ચે ગમખ્વાર અકસ્માત સર્જાયો હતો. આ અકસ્માતમાં એક જ પરિવારના 3 લોકોના મોત નિપજ્યા છે.

ડેડીયાપાડામાં નિગટ ગામ નજીક અકસ્માત
પ્રાપ્ત વિગત મુજબ નર્મદા જિલ્લાના ડેડીયાપાડા તાલુકાના નિગટ ગામ પાસે મોટરસાઈકલ અને કાર વચ્ચે ગોઝારો અકસ્માત સર્જાયો હતો. નિગટ ગામ નજીક સર્જાયેલા અકસ્માતમાં એક જ પરિવારના 3 સભ્યોના મોત નિપજ્યા છે. આ અકસ્માતની જાણ થતાં રાહદારીઓના ટોળે-ટોળા ઘટના સ્થળે એકઠા થયા હતા. રાહદારીઓ દ્વારા આ અંગેની જાણ પોલીસને કરવામાં આવતા પોલીસની ટીમ તાત્કાલિક બનાવ સ્થળે દોડી આવી હતી. જોકે, કારચાલક અકસ્માત સર્જીને ભાગી ગયા હતા.

કાર ચાલક નશામાં હોવાની ચર્ચા 
પોલીસ દ્વારા કારની તપાસ કરવામાં આવતા કારમાંથી બીયરની ખાલી બોટલો પણ મળી આવી છે. અકસ્માત સમયે કારચાલક નશામાં હોવાનું સ્થાનિક દ્વારા પોલીસને જણાવવામાં આવ્યું છે. હાલ પોલીસે ત્રણેય મૃતકોના મૃતદેહને પીએમ અર્થે ડેડીયાપાડાની સિવિલ હોસ્પિટલમાં ખસેડ્યા છે. સાથે જ ગુનો નોંધી કારના નંબરના આધારે ચાલકની શોધખોળ હાથ ધરી છે. તો એક જ પરિવારના ત્રણ સભ્યોના મોતથી પરિવાર પર શોકનું મોજુ ફરી વળ્યું છે.