રાજસ્થાનમાં ગોગામેડી હત્યા કેસમાં પોલીસ તપાસ ચાલુ છે ત્યારે જયપુર સિટી પોલીસ કમિશનરે આ અંગે પ્રેસ કોન્ફરન્સ કરી છે. પોલીસે સુખદેવ સિંહ ગોગામેડી હત્યા કેસના બંને શૂટર્સ સહિત ત્રણ લોકોની ધરપકડ કરી છે. રાજસ્થાન પોલીસે દિલ્હી પોલીસની મદદથી શૂટર્સ રોહિત રાઠોડ અને નીતિન ફૌજીની સાથે તેમના સહયોગી ઉધમ સિંહની શનિવારે મોડી રાત્રે ચંદીગઢથી ધરપકડ કરી હતી.
શું કહ્યું પોલીસ કમિશનરે ?
મળતી માહિતી મુજબ,જયપુર પોલીસ કમિશનર બીજુ જ્યોર્જ જોસેફે રવિવારે બપોરે એક પ્રેસ કોન્ફરન્સમાં જણાવ્યું કે સુખદેવ સિંહ ગોગામેડીની હત્યા બાદ પોલીસની ટીમ સતત બદમાશોનો પીછો કરી રહી છે. એસઆઈટી પાસેથી મળેલા ઈનપુટ્સ અને આરોપીના રૂટ મેપનો ખુલાસો થયો હતો. આરોપી ડિડવાના પહેલા હિસાર ગયા હતા. તેમણે કહ્યું કે, એક તરફ આરોપીઓના ઠેકાણા અંગે માહિતી લેવામાં આવી છે અને બીજી તરફ તેમની શોધખોળ પણ ચાલી રહી છે. બીજી તરફ આરોપી હરિયાણા તરફ ભાગીને હિસાર પહોંચ્યો હતો. દિલ્હીની વિશેષ પોલીસની ટીમે હિસારથી અમારી મદદ કરી હતી. રિયલ ટાઈમ લોકેશન મળ્યા બાદ અમે આરોપીની અટકાયત કરી હતી. અમે અમારી તપાસ શરૂ કરી છે. અમે રામવીર જાટની આઠ દિવસની પોલીસ કસ્ટડી લીધી છે. આ પહેલું પગલું છે. બીજા પગલામાં મુખ્ય કાવતરાખોર ફસાઈ જશે.
દેશમાંથી ભાગી જવાનો હતો પ્લાન
દિલ્હી પોલીસે રવિવારે જણાવ્યું હતું કે જયપુરમાં રાષ્ટ્રીય રાજપૂત કરણી સેનાના વડા સુખદેવ સિંહ ગોગામેડી પર કથિત રીતે ગોળી મારનાર બે વ્યક્તિઓ ભાગી જતાં નકલી આઈડી પર ચંદીગઢની એક હોટલમાં રોકાયા હતા. સૂત્રોએ જણાવ્યું હતું કે બંને હુમલાખોરો – જયપુરના રોહિત રાઠોડ અને હરિયાણાના મહેન્દ્રગઢના નીતિન ફૌજીએ દેશ છોડીને ભાગી જવાની યોજના બનાવી હતી અને ગોગામેડીને મારવા માટે પ્રત્યેકને 50,000 રૂપિયાનું વચન આપવામાં આવ્યું હતું.
