અરુણાચલ પ્રદેશના તેજુ એરપોર્ટ પર 170 કરોડના ખર્ચે બનેલા નવા ટર્મિનલનું આજે રવિવારે ઉદ્ઘાટન કરવામાં આવ્યું હતું. આ દરમિયાન કેન્દ્રીય નાગરિક ઉડ્ડયન મંત્રી જ્યોતિરાદિત્ય સિંધિયા હાજર રહ્યા હતા. ઉદ્ઘાટન કાર્યક્રમ દરમિયાન કેન્દ્રીય મંત્રી સિંધિયાએ ઓક્ટોબર સુધીમાં અરુણાચલમાં ત્રણ નવા હવાઈ માર્ગો ખોલવાની વાત પણ કરી હતી.
ઇટાનાગર અને નવી દિલ્હી વચ્ચે શરૂ થશે ફ્લાઈટ
પૂર્વોત્તર રાજ્યના લોહિત જિલ્લામાં તેઝુ એરપોર્ટના નવા ટર્મિનલનું ઉદ્ઘાટન કરતાં સિંધિયાએ કહ્યું કે, કેન્દ્રની UDAN-5 યોજના હેઠળ, હોલોંગીના ડોની પોલા એરપોર્ટથી ઇટાનગર અને નવી દિલ્હી વચ્ચે નવી ફ્લાઇટ સેવાઓ શરૂ કરવામાં આવશે. તેનો ઉદ્દેશ નાગરિકોને ઉડ્ડયન સેવાઓની સરળ ઍક્સેસ પ્રદાન કરવાનો છે. આ માટે નાના પ્રાદેશિક એરપોર્ટનો વિકાસ કરવામાં આવી રહ્યો છે. ડોની પોલો, પાસીઘાટ અને ઝીરો એરપોર્ટ પછી તેજુ એરપોર્ટ રાજ્યનું ચોથું અને ઉત્તરપૂર્વમાં 17મું એરપોર્ટ છે. કેન્દ્ર સરકારની સિદ્ધિઓ વર્ણવતા તેમણે કહ્યું કે, દેશમાં 65 વર્ષમાં માત્ર 74 એરપોર્ટ બન્યા પરંતુ ભાજપની કેન્દ્ર સરકારે છેલ્લા 9 વર્ષમાં 75 નવા એરપોર્ટ બનાવ્યા છે.
ઉત્તર-પૂર્વના રાજ્યોની દાયકાઓથી ઉપેક્ષા કરાઈ
સિંધિયાએ કહ્યું, પીએમ મોદી અને મુખ્યમંત્રી પેમા ખાંડુની જોડી અરુણાચલને નવી ઊંચાઈએ લઈ જઈ રહી છે. સિંધિયાએ કહ્યું, આ વિસ્તાર દેશના તાજમાં એક રત્ન છે. કેન્દ્રીય મંત્રીએ કહ્યું કે, ઉત્તર-પૂર્વના આઠ રાજ્યોની દાયકાઓથી ઉપેક્ષા કરવામાં આવી રહી છે. વડા પ્રધાન નરેન્દ્ર મોદી સત્તામાં આવ્યા પછી તેમને વિકાસને મોટો વેગ મળ્યો. તેમણે કહ્યું, આ વિસ્તાર દેશના તાજમાં એક રત્ન છે. આ ક્ષેત્ર ભારત માટે બાગાયત અને કૃષિ સંભવિતતા ધરાવતા દક્ષિણ પૂર્વ એશિયાના દેશો માટે પ્રવેશદ્વાર હશે.
અરુણાચલ પ્રદેશ સાથે મારો જૂનો સંબંધ
અરુણાચલ પ્રદેશ સાથે મારો સંબંધ ઘણો જૂનો છે. જ્યારે મારા દાદીના બનેવી 1960ના દાયકામાં રાજ્યમાં મેજર જનરલ તરીકે તૈનાત હતા, ત્યારે ભારત સરકારે તેમને સરહદી ગામોમાંથી એકનું નામ આપવાની તક આપી. જે હવે વિજય નગરના નામથી પ્રખ્યાત છે. તેજુ એરપોર્ટના ઉદ્ઘાટન પ્રસંગે એરપોર્ટ ઓથોરિટી ઓફ ઈન્ડિયાના સભ્ય (પ્લાનિંગ) એ.કે. પાઠકે કહ્યું કે, તેજુના લોકો માટે આજનો દિવસ શુભ છે. ટર્મિનલ પીક અવર્સમાં 300 મુસાફરોને હેન્ડલ કરી શકશે. જેના કારણે અહીં એક જ સમયે બે ATR એરક્રાફ્ટ આવી શકે છે. રનવેની લંબાઈ 1,500 મીટર છે. એરપોર્ટ પર નવા વિકસિત ઈન્ફ્રાસ્ટ્રક્ચરમાં વિસ્તૃત રનવે, નવું એપ્રોન, નવું ટર્મિનલ બિલ્ડિંગ, ફાયર સ્ટેશન અને એટીસી ટાવરનો સમાવેશ થાય છે.
