પાટણ-શિહોરી હાઈવે પર ડમ્પર ચાલકએ બાઈકને ટક્કર મારતા 3નાં મોત

પાટણ-શિહોરી હાઈવે પર પુર ઝડપે અને ગફલતભરી રીતે ડમ્પર હંકારનારાઓને કારણે અવાર-નવાર અકસ્માત સર્જાતા હોય છે. જેમાં કેટલાય નિર્દોષ લોકોએ પોતાનો જીવ ગુમાવવાનો વારો આવે છે. ત્યારે અજાણ્યો ડમ્પર ચાલક બાઈક સવાર 3 યુવકોને ટક્કર મારી ફરાર થઈ ગયો હતો. ડમ્પર ચાલકે બાઈકને ટક્કર મારતા બાઈક સવાર ત્રણ મિત્રોનું મોત નિપજ્યું.

ડમ્પર ચાલકે બાઈકને ટક્કર મારતા બાઈક સવાર 3 મિત્રોનું મોત

સરસ્વતી તાલુકાનાં અઘાર ગામના ત્રણ મિત્રો અદુજી સોલંકી, જગતસંગ સોલંકી, અર્જુનસિંહ સોલંકીના મોત નિપજતા ગામમાં ગમગીની છવાઈ જવા પામી હતી. મહત્વનું છે કે, ત્રણેય મિત્રો મોડી રાત્રે પાટણથી ઘરે પરત જઈ રહ્યા હતા. તે દરમ્યાન અજાણ્યા ડમ્પર ચાલકે પુર ઝડપે અને ગફલતભરી રીતે ડમ્પર હંકારી ભુતિયાવાસણા ગામ નજીક બાઈકને પાછળથી ટક્કર મારતા ત્રણેય યુવાનો રોડ પર પટકાયા હતા. ત્યારે ત્રણમાંથી બે મિત્રોને માથાનાં ભાગે ગંભીર ઈજાઓ પહોંચતા તેઓનું ઘટના સ્થળે જ મોત નિપજ્યું હતું. ત્યારે આ અંગેની જાણ 108 ને કરતા 108 તાત્કાલિક ઘટના સ્થળે પહોંચી ઘાયલ એક યુવકને સારવાર અર્થે હોસ્પિટલ ખસેડે તે પહેલા જ રસ્તામાં જ તેનું મોત નિપજ્યું હતું. ત્યારે એક જ ગામનાં ત્રણ મિત્રોનાં મોત નિપજતા ગામ તેમજ મૃતકનાં પરિવારજનોમાં શોકની લાગણી પ્રસરી જવા પામી હતી.

અજાણ્યા ડમ્પર ચાલક સામે પોલીસ મથકે નોંધાવી ફરિયાદ

આ ઘટનાની જાણ સરસ્વતી તાલુકા પોલીસને થતાં પોલીસે ઘટના સ્થળે આવી મૃતદેહોને પીએમ અર્થે મોકલવાની તજવીજ હાથ ધરી હતી. ત્યારે આ બાબતે મૃતકનાં મોટાભાઈ મહેન્દ્રસિંહ રેવાજી સોલંકીએ અજાણ્યા ડમ્પર ચાલક સામે પોલીસ મથકે ગુનો નોંધાવતા પોલીસે અકસ્માતે ગુનો નોંધી આગળની કાર્યવાહિ હાથ ધરી છે.

આ પણ વાંચો: ભુજ: પોલીસ કર્મચારીને દારૂના નશામાં વોટ્સએપ ગ્રુપમાં મેસેજ કરવો ભારે પડ્યો