ભાજપના ઉમેદવારનું નામાંકન રદ, હવે આ ઉમેદવાર પાર્ટી વતી લડશે ચૂંટણી

• પશ્ચિમ બંગાળના બીરભૂમથી ભાજપના ઉમેદવાર દેબાશીષ ધરનું નામાંકન રદ કરવામાં આવ્યું છે. તેઓ નો ડ્યૂઝ સર્ટિફિકેટ જમા કરાવી શક્યા ન હોવાના કારણે ફોર્મ રદ કરવામાં આવ્યું છે

બીરભૂમ, 26 એપ્રિલ: ગુજરાતના સુરત લોકસભા બેઠકના કોંગ્રેસના ઉમેદવાર નિલેશ કુંભાણીનું ફોર્મ રદ થયા બાદ હવે પશ્ચિમ બંગાળના બીરભૂમથી ભાજપના ઉમેદવાર દેબાશીષ ધરનું નામાંકન રદ કરવામાં આવ્યું છે. દેબાશીષ ધર નો ડ્યૂઝ સર્ટિફિકેટ (કોઈ બાકી લ્હેણું નથીનું પ્રમામપત્ર) જમા કરાવી શક્યા ન હતા. અગાઉ દેવાશિષ ધરે ગયા મહિને IPS પદ પરથી રાજીનામું આપી દીધું હતું. ચૂંટણી પંચ સાથે સંકળાયેલા સૂત્રોએ જણાવ્યું કે દિલ્હી હાઈકોર્ટનો એક આદેશ છે જેમાં કહેવામાં આવ્યું છે કે જે એજન્સી સાથે કામ કરી રહ્યા હોવ તેની પાસેથી નો ડ્યૂઝ સર્ટિફિકેટ મેળવવું જરૂરી છે. આરપી એક્ટની કલમ 36 મુજબ ઉમેદવારે ચૂંટણી દરમિયાન પાણી, વીજળી અને મકાનના બિલ ચૂકવવાના હોય છે. આ વિભાગો લખે છે કે અમારી પાસેથી કોઈ બાકી લેણું નથી.

દેવાતનુ ભટ્ટાચાર્ય ભાજપના નવા ઉમેદવાર હશે

એવું કહેવામાં આવી રહ્યું છે કે બીજેપી દ્વારા બીજા ઉમેદવાર તરીકે વરિષ્ઠ જિલ્લા નેતા દેબતનુ ભટ્ટાચાર્યનું નામ મુકવામાં આવ્યું હતું. હવે દેવાતનુ ભટ્ટાચાર્ય ભાજપના સત્તાવાર ઉમેદવાર હશે. તેમણે ગુરુવારે બીરભૂમ લોકસભા સીટ માટે ઉમેદવારી પત્ર ભર્યું હતું. તેઓ ચૂંટણી પ્રચારમાં પણ લાગી ગયા છે.

કોણ છે દેબાશિષ ધર?

એપ્રિલ 2021માં જ્યારે વિધાનસભાની ચૂંટણી ચાલી રહી હતી ત્યારે દેબાશિષ ધર કૂચ બિહારના એસપી હતા. સીઆઈએસએફએ 10 એપ્રિલે સીતલકુચીમાં એક બૂથ પર ગોળીબાર કર્યો હતો, જેમાં ચાર મતદારો માર્યા ગયા હતા. ધરને રાજ્ય સરકાર દ્વારા સસ્પેન્ડ કરવામાં આવ્યા હતા પરંતુ તેઓ સેન્ટ્રલ એડમિનિસ્ટ્રેટિવ ટ્રિબ્યુનલમાં ગયા હતા અને આદેશ રદ કરવામાં આવ્યો હતો. સપ્ટેમ્બર 2022 માં રાજ્ય સરકારે ભ્રષ્ટાચાર નિવારણ અધિનિયમ હેઠળ કેસ નોંધ્યો હતો, જેનો ધરે તેમના સોગંદનામામાં ઉલ્લેખ કર્યો હતો કે તેમની સામે કેસ પેન્ડિંગ છે.

અગાઉ, તેમણે કહ્યું હતું કે રાજ્ય સરકારે કોઈ મંજૂરી આપી નથી કારણ કે ધર સામે ખાતાકીય કાર્યવાહી ચાલી રહી છે. જેના કારણે ધર માટે સ્થિતિ મુશ્કેલ બની ગઈ હતી. ભાજપે કહ્યું હતું કે જો તેમની ઉમેદવારી ટેકનિકલ કારણોસર રદ કરવામાં આવે તો ભાજપ પાસે ભટ્ટાચાર્ય હશે.

આ પણ વાંચો: બીજા તબક્કાના મતદાનમાં નિર્ણાયક બની શકે એવી બેઠકો કેટલી? જાણો અહીં