નરેન્દ્ર દાભોલકર હત્યા કેસમાં 2 શૂટરોને આજીવન કેદ, કોર્ટે 3 આરોપીઓને નિર્દોષ જાહેર કર્યા

પુણે, 10 મે: અંધશ્રદ્ધા સામે લડી રહેલા કાર્યકર્તા ડૉ. નરેન્દ્ર દાભોલકરની હત્યાના કેસમાં મહારાષ્ટ્રના પુણેની વિશેષ અદાલતે 11 વર્ષ બાદ પોતાનો ચુકાદો આપ્યો છે. આ ષડયંત્રના માસ્ટર માઈન્ડ ડૉ. વીરેન્દ્ર તાવડે અને અન્ય બે આરોપી વકીલો સંજીવ પુનાલેકર અને વિક્રમ ભાવેને અદાલતે પુરાવાના અભાવે નિર્દોષ જાહેર કર્યા છે.

દાભોલકરને ગોળી મારનાર શરદ કાલસ્કર અને સચિન એન્ડુરને આજીવન કેદની સજા ફટકારવામાં આવી છે અને 20 ઓગસ્ટે પૂણેના ઓમકારેશ્વર બ્રિજ પર મોર્નિંગ વોક માટે નીકળેલા દાભોલકરને ગોળી મારી હત્યા કરવામાં આવી હતી. જેમાં 5 લોકોને આરોપી બનાવવામાં આવ્યા હતા. ગેરકાનૂની પ્રવૃતિઓ (નિવારણ) અધિનિયમ, સાથે સંબંધિત કેસ માટે વિશેષ અદાલતના વધારાના સેશન્સ જજ જાધવે આ નિર્ણય આપ્યો હતો.

સીબીઆઈએ તાવડે પર આ કેસમાં મુખ્ય કાવતરાખોર હોવાનો આરોપ લગાવ્યો હતો. મહારાષ્ટ્ર અંધશ્રદ્ધા નિર્મૂલન સમિતિના સ્થાપક દાભોલકરને 20 ઓગસ્ટ, 2013ના રોજ પુણેમાં સવારે બે બાઇક પર આવેલા હુમલાખોરોએ ગોળી મારી હતી. દાભોલકર ઘણા વર્ષો સુધી સમિતિ ચલાવતા હતા, અંધશ્રદ્ધા નાબૂદી સંબંધિત વિવિધ પુસ્તકો પ્રકાશિત કર્યા હતા અને ઘણી વર્કશોપ પણ યોજી હતી.

આ હત્યા બાદ ભારે હોબાળો થયો હતો. બાદમાં, દાભોલકરની પુત્રી અને પુત્ર દ્વારા દાખલ કરાયેલી અરજીઓ પર, બોમ્બે હાઈકોર્ટે આ કેસ પુણે પોલીસ પાસેથી સેન્ટ્રલ બ્યુરો ઑફ ઈન્વેસ્ટિગેશન (CBI)ને ટ્રાન્સફર કર્યો હતો.

બાદમાં સીબીઆઈએ આ કેસ પોતાના હાથમાં લીધો હતો

આ કેસમાં, પુણે સેશન્સ કોર્ટે 15 સપ્ટેમ્બર, 2021 ના ​​રોજ તમામ પાંચ આરોપીઓ સામે આરોપો ઘડ્યા હતા. કોર્ટે કહ્યું કે દાભોલકરને ખતમ કરવા માટે એક ષડયંત્ર રચવામાં આવ્યું હતું જેથી કરીને લોકોના મનમાં મોટા પાયા પર ડર પેદા થાય અને ‘અંધાશ્રદ્ધા નિર્મૂલન સમિતિ’નું કામ કોઈ ન કરી શકે.

ટ્રાયલ દરમિયાન, ફરિયાદ પક્ષે 20 સાક્ષીઓની પૂછપરછ કરી હતી જ્યારે બચાવ પક્ષે બે સાક્ષીઓની પૂછપરછ કરી હતી. ફરિયાદ પક્ષે તેની અંતિમ દલીલોમાં કહ્યું હતું કે આરોપીઓ દાભોલકરના અંધશ્રદ્ધા સામેના અભિયાનનો વિરોધ કરતા હતા. શરૂઆતમાં આ કેસની તપાસ પુણે પોલીસ કરી રહી હતી, પરંતુ બોમ્બે હાઈકોર્ટના આદેશ બાદ 2014માં સીબીઆઈએ આ કેસ સંભાળ્યો અને જૂન 2016માં હિન્દુ દક્ષિણપંથી સંગઠન સાથે સંકળાયેલા ડૉ.વીરેન્દ્ર સિંહ તાવડેની ધરપકડ કરી હતી.

તાવડેને મુખ્ય કાવતરાખોર માનવામાં આવતો હતો

ફરિયાદ પક્ષ અનુસાર, તાવડે હત્યાના મુખ્ય કાવતરાખોરોમાંનો એક હતો. તેમણે દાવો કર્યો હતો કે સનાતન સંસ્થા દાભોલકરની સંસ્થા મહારાષ્ટ્ર અંધશ્રદ્ધા નિર્મૂલન સમિતિ દ્વારા કરવામાં આવતા કામનો વિરોધ કરે છે. તાવડે અને અન્ય કેટલાક આરોપીઓ આ સંસ્થા સાથે જોડાયેલા હતા.

સીબીઆઈએ તેની ચાર્જશીટમાં શરૂઆતમાં ભાગેડુ સારંગ અકોલકર અને વિનય પવારને શૂટર્સ તરીકે નામ આપ્યા હતા પરંતુ બાદમાં સચિન અન્દુરે અને શરદ કાલસ્કરની ધરપકડ કરી હતી અને પૂરક ચાર્જશીટમાં દાવો કર્યો હતો કે તેઓએ દાભોલકરને ગોળી મારી હતી. ત્યારબાદ, કેન્દ્રીય એજન્સીએ એડવોકેટ સંજીવ પુનાલેકર અને વિક્રમ ભાવેની કથિત સહ-ષડયંત્રકારી તરીકે ધરપકડ કરી હતી.

આ પણ વાંચો : મોબાઈલ ચોરીની ફરિયાદ નોંધાવવાનું ભારે પડ્યું? જાણો રમૂજ અને આઘાતની ઘટના વિશે