બાંગ્લાદેશમાં ફસાયા હતા 190 ભારતીય ટ્રક ડ્રાઈવર, કૂચ બિહાર માર્ગ પરથી ભારતમાં એન્ટ્રી

બાંગ્લાદેશ- 6 ઓગસ્ટ : બાંગ્લાદેશમાં તખ્તાપલટ બાદ સમગ્ર દેશમાં અરાજકતાનો માહોલ છે. શેખ હસીનાએ વડાપ્રધાન પદ પરથી રાજીનામું આપી દીધું છે અને દેશ છોડીને ભારત ચાલ્યા ગયા છે. આવા માહોલમાં 190 ભારતીય ટ્રક ડ્રાઇવરો બાંગ્લાદેશમાં અટવાયા હતા. દરેકને કૂચ બિહારમાં ચાંગરાબંધ ભારત-બાંગ્લાદેશ સરહદ દ્વારા સુરક્ષિત રીતે ભારત લાવવામાં આવ્યા છે. ગયા અઠવાડિયે તમામ ડ્રાઇવરો ટ્રકમાં પથ્થરો ભરીને બાંગ્લાદેશ ગયા હતા. દરમિયાન, ત્યાં બળવો થયો અને રાજકીય પરિસ્થિતિ અચાનક બદલાઈ ગઈ. સમગ્ર દેશમાં કર્ફ્યુ લાદવામાં આવ્યો છે. આવી સ્થિતિમાં તમામ ટ્રક ચાલકો ત્યાં જ અટવાયા હતા. સોમવારે રાત્રે તમામને તરત જ સુરક્ષિત રીતે ભારત લાવવામાં આવ્યા હતા.

બાંગ્લાદેશમાં કર્ફ્યુના કારણે ટ્રક ચાલકો ફસાયા હતા
ભારત પરત ફરેલા મેખલીગંજના રહેવાસી ટ્રક ડ્રાઈવર મન્સૂર અલીએ જણાવ્યું હતું કે Bangladeshમાં લાદવામાં આવેલા કર્ફ્યુના કારણે ટ્રકોની અવરજવર પર પ્રતિબંધ મુકવામાં આવ્યો છે. આવી સ્થિતિમાં, ત્યાં અટવાયેલા હોવાથી અમે ચિંતિત હતા. ત્યારબાદ BSF અને કૂચબિહાર જિલ્લા પોલીસની મદદથી અમને અમારા દેશમાં પાછા લાવવામાં આવ્યા.

બાંગ્લાદેશનો આંતરરાષ્ટ્રીય વેપાર સોમવારથી બંધ
કૂચ બિહારના એએસપી સંદીપ ગરાઈએ જણાવ્યું કે, ‘બાંગ્લાદેશથી 190 ટ્રક ડ્રાઈવરોને ભારત પરત લાવવામાં આવ્યા છે.’ તેમણે કહ્યું કે, ‘બાંગ્લાદેશની સ્થિતિને ધ્યાનમાં રાખીને સરહદી વિસ્તારમાં વધારાની તકેદારી રાખવામાં આવી રહી છે.’ બાંગ્લાદેશમાં ચાલી રહેલી અશાંતિને કારણે સોમવારથી આંતરરાષ્ટ્રીય વેપાર સંચાર બંધ છે.

ભારતથી પથ્થરોની નિકાસ
એએસપીએ જણાવ્યું કે ભારતમાંથી નદીના મોટા ભાગના પથ્થરો બાંગ્લાદેશ જાય છે. આ ટ્રક ડ્રાઈવરો એ જ પથ્થર લઈને બાંગ્લાદેશ ગયા હતા અને ત્યાં ફેલાયેલી અરાજકતા દરમિયાન કર્ફ્યુમાં અટવાઈ ગયા હતા. તેઓ ડરતા હતા કે આવી સ્થિતિમાં તેઓ ભારત કેવી રીતે પાછા આવશે. આખરે તમામ ટ્રક ચાલકો સુરક્ષિત પરત ફર્યા છે.

આ પણ વાંચો : હિંદુ મંદિરો પર થયા હુમલા, કેવી છે સ્થિતિ? બાંગ્લાદેશમાં શું ચાલી રહ્યું છે જાણો આ રિપોર્ટમાં