પિતાનો જીવ બચાવવા 17 વર્ષની દીકરી લિવરનું કરશે દાન, કોર્ટે આપી મંજૂરી

• 42 વર્ષના પિતાનો જીવ બચાવવા દીકરી કરવા માગતી હતી લિવરનું દાન
• દીકરીના 18 વર્ષ પૂરા ન થયા હોવા છતાં કોર્ટે આપી લિવરનું દાન કરવાની મંજૂરી

મધ્યપ્રદેશ, 27 જૂન: મધ્યપ્રદેશ હાઈકોર્ટની ઈન્દોર બેન્ચે ગુરુવારે (27 જૂન) લીવરની ગંભીર બીમારીથી પીડિત ખેડૂતને તેની 17 વર્ષની પુત્રીના અંગનું ટ્રાન્સપ્લાન્ટ સર્જરી માટે દાન કરવાની મંજૂરી આપી હતી. ઈન્દોરના ગ્રામીણ વિસ્તારના ખેડૂત 42 વર્ષીય શિવનારાયણ બાથમે હાઈકોર્ટમાં અરજી દાખલ કરીને વિનંતી કરી હતી કે તેમની 17 વર્ષની પુત્રી તેના લિવરનો એક ભાગ તેમને દાન કરવા માટે તૈયાર છે અને તેમને ટ્રાન્સપ્લાન્ટ કરવાની મંજૂરી આપવામાં આવે.

વહેલી તકે સાવધાની સાથે સર્જરી કરાવવી જોઈએ: કોર્ટ

હાઈકોર્ટના જસ્ટિસ વિશાલ મિશ્રા સમક્ષ અરજીની સુનાવણી દરમિયાન સરકારી વકીલે કોર્ટને જણાવ્યું કે રાજ્ય સરકાર દ્વારા રચવામાં આવેલા મેડિકલ બોર્ડે સગીર બાળકીના સ્વાસ્થ્યની તપાસ કર્યા બાદ જાણવા મળ્યું છે કે તે તેના બીમાર પિતાને લિવરનો એક ભાગ દાન કરી શકે છે. મેડિકલ બોર્ડના આ રિપોર્ટને ધ્યાનમાં રાખીને કોર્ટે બાથમની અરજી સ્વીકારી હતી. સિંગલ બેન્ચે એ પણ નિર્દેશ આપ્યો છે કે તમામ સાવચેતી રાખીને લિવર ટ્રાન્સપ્લાન્ટની પ્રક્રિયા શક્ય તેટલી વહેલી તકે પૂર્ણ કરવામાં આવે.

6 વર્ષથી લીવરની ગંભીર બીમારીથી પીડાતા હતા પિતા

બાથમના વકીલ નિલેશ મનોરે જણાવ્યું હતું કે તેઓ છેલ્લા 6 વર્ષથી લીવરની ગંભીર બીમારીથી પીડિત છે અને તેઓ શહેરની એક ખાનગી હોસ્પિટલમાં દાખલ છે. મનોરે જણાવ્યું કે તેમના ક્લાયન્ટને પાંચ દીકરીઓ છે અને જે દીકરીએ તેમના લિવરનો હિસ્સો તેમને દાન કરવાની ઈચ્છા વ્યક્ત કરી હતી તે તેમની સૌથી મોટી દીકરી છે.

મને મારી દીકરી પર ગર્વ છે: દિકરીના પિતા

મોટી દીકરી પ્રીતિ 31 જુલાઈએ 18 વર્ષની થશે. મનોરે કહ્યું કે, “બાથમના પિતા 80 વર્ષના છે, જ્યારે તેમની પત્ની ડાયાબિટીસના દર્દી છે. તેથી તેની પુત્રી તેમના લિવરનો એક ભાગ દાન કરવા આગળ આવી જેથી તે તેમના બીમાર પિતાનો જીવ બચાવી શકે.” બાથમે કહ્યું, “મને મારી પુત્રી પર ગર્વ છે.”

આ પણ વાંચો: લાલકૃષ્ણ અડવાણીને એઈમ્સમાંથી રજા આપવામાં આવી, ગત રાત્રે થયા હતા દાખલ