મહારાષ્ટ્રમાં 1 મહિલા સહિત 11 નક્સલવાદીઓએ CM ફડણવીસ સમક્ષ શરણાગતિ સ્વીકારી

ગઢચિરોલી, 1 જાન્યુઆરી : મહારાષ્ટ્રના ગઢચિરોલી જિલ્લામાં મુખ્ય પ્રધાન દેવેન્દ્ર ફડણવીસ સમક્ષ 11 નક્સલવાદીઓએ આત્મસમર્પણ કર્યું છે. આમાં અગ્રણી નક્સલવાદી નેતા તારક્કા સિદામ પણ સામેલ છે. શરણાગતિ ગઢચિરોલી પોલીસ હેડક્વાર્ટર ખાતે થઈ હતી, જ્યાં મુખ્ય પ્રધાન દેવેન્દ્ર ફડણવીસે નક્સલવાદીઓનું સ્વાગત કર્યું હતું અને તેમને મુખ્ય પ્રવાહમાં પાછા ફરવા પ્રોત્સાહિત કર્યા હતા. આ દરમિયાન મુખ્યમંત્રી દેવેન્દ્ર ફડણવીસે કહ્યું કે રાજ્ય ટૂંક સમયમાં નક્સલવાદથી મુક્ત થઈ જશે. ગઢચિરોલી જિલ્લાના અંતરિયાળ વિસ્તારોમાં નક્સલવાદીઓનો પ્રભાવ ઘટી રહ્યો છે.

નક્સલવાદ પર ફડણવીસે શું કહ્યું?

ગઢચિરોલીમાં પત્રકારો સાથે વાત કરતા મુખ્યમંત્રીએ કહ્યું કે નક્સલવાદ હવે તેના અંતને આરે છે. તેમણે કહ્યું કે સરકારે માઓવાદીઓના પ્રભાવને ખતમ કરીને ગઢચિરોલીને ‘પ્રથમ જિલ્લો’ બનાવવાની પ્રક્રિયા શરૂ કરી છે. ગઢચિરોલીને ઘણીવાર મહારાષ્ટ્રનો છેલ્લો જિલ્લો કહેવામાં આવે છે, કારણ કે તે રાજ્યની પૂર્વ સરહદ પર સ્થિત છે.

ફડણવીસે મહારાષ્ટ્ર સ્ટેટ રોડ ટ્રાન્સપોર્ટ કોર્પોરેશન (MSRTC)ની 32 કિમી લાંબા ગટ્ટા-ગરદેવાડા-વાંગેતુરી રૂટ અને વાંગેતુરી-ગરદેવાડા-ગટ્ટા-અહેરી રૂટ પરની બસ સેવાઓનું ઉદ્ઘાટન કર્યું, જે વિદર્ભ ક્ષેત્રમાં સ્થિત છે. મુખ્યમંત્રીએ કહ્યું કે સરકાર માટે ગઢચિરોલી છેલ્લું (પ્રાયોરિટી લિસ્ટમાં) નથી, પરંતુ ‘પ્રથમ જિલ્લો’ છે.

ગઢચિરોલી પોલીસની કામગીરીની પ્રશંસા

દેવેન્દ્ર ફડણવીસે કહ્યું કે આજે જે રોડ લિંકનું ઉદ્ઘાટન કરવામાં આવ્યું છે તે મહારાષ્ટ્રને સીધું છત્તીસગઢ સાથે જોડશે. તેમણે કહ્યું કે આ સિવાય વિસ્તાર નક્સલવાદીઓના પ્રભાવથી મુક્ત થઈ રહ્યો છે અને લોકોને આઝાદીના 75 વર્ષ બાદ MSRTC બસ સેવા મળી રહી છે.

ફડણવીસે નક્સલવાદ વિરુદ્ધ ગઢચિરોલી પોલીસના કામની પ્રશંસા કરી અને કહ્યું કે લોકો હવે નક્સલવાદીઓને સમર્થન આપતા નથી અને ન તો કોઈ પ્રતિબંધિત નક્સલવાદી સંગઠનમાં જોડાવા માંગે છે. તે ખૂબ જ મહત્વપૂર્ણ છે.

ટોચના માઓવાદીઓ આત્મસમર્પણ કરી રહ્યા છે

દરમિયાન કોંસરીમાં લોયડ્સ મેટલ્સ એન્ડ એનર્જી લિમિટેડના વિવિધ વિભાગોનું ઉદ્ઘાટન કર્યા પછી, ફડણવીસે એક મીટિંગમાં જણાવ્યું હતું કે, રાજ્ય સરકાર છેલ્લા દસ વર્ષથી ગઢચિરોલીની કાયાપલટ કરવાનો પ્રયાસ કરી રહી છે, જેથી સામાન્ય માણસને આ ક્ષેત્રમાં લાવી શકાય અને આ જિલ્લામાંથી નક્સલવાદને જડમૂળથી ઉખાડી શકાય છે.

તેમણે કહ્યું કે વડા પ્રધાન નરેન્દ્ર મોદી અને કેન્દ્રીય ગૃહ પ્રધાન અમિત શાહના નેતૃત્વ અને ગઢચિરોલી પોલીસ અને સ્થાનિક વહીવટીતંત્રના સંયુક્ત પ્રયાસોને કારણે, છેલ્લા ચાર વર્ષમાં નક્સલવાદીઓ એક પણ વ્યક્તિને તેમના જૂથમાં ઉમેરી શક્યા નથી. તેમણે કહ્યું કે ટોચના માઓવાદીઓ આત્મસમર્પણ કરી રહ્યા છે અને મુખ્ય પ્રવાહમાં જોડાઈ રહ્યા છે.

આ પણ વાંચો :- અમેરિકામાં નવા વર્ષની ઉજવણી વખતે મોટી ઘટના, ભીડને ટ્રકથી કચડી ફાયરિંગ કરાયું, 12ના મૃત્યુ