બેંગ્લોર, 28 માર્ચ : કર્ણાટકની રાજધાની બેંગલુરુમાં રામેશ્વરમ કાફેમાં 1 માર્ચે બ્લાસ્ટની ઘટનાને અંજામ આપનાર આતંકવાદી NIA કેસમાં પહેલાથી જ વોન્ટેડ હતો. NIAએ મુસાવીર હુસૈન શાજીબ અને અબ્દુલ મતીન તાહા પર 3-3 લાખ રૂપિયાનું ઈનામ રાખ્યું હતું. વોન્ટેડ હોવા છતાં બંનેએ બોમ્બ બ્લાસ્ટને અંજામ આપ્યો હતો. બંને શિવમોગાના ISIS મોડ્યુલ સાથે જોડાયેલા હતા. મળતી માહિતી મુજબ, રામેશ્વરમ કાફે બ્લાસ્ટ કેસમાં નેશનલ ઇન્વેસ્ટિગેશન એજન્સી (NIA)ને મોટી સફળતા મળી છે. બુધવારે ત્રણ રાજ્યોમાં અનેક સ્થળોએ મોટાપાયે દરોડા પાડ્યા બાદ NIAએ એક મુખ્ય ષડયંત્રકારની ધરપકડ કરી છે. NIAની ટીમો દ્વારા કર્ણાટકમાં 12, તમિલનાડુમાં 5 અને ઉત્તર પ્રદેશમાં એક સ્થાન સહિત કુલ 18 સ્થળોએ કાર્યવાહી કરવામાં આવી હતી.
NIA ની તપાસમાં થયો મોટો ખુલાસો
આ દરમિયાન સહ કાવતરાખોર મુઝમ્મિલ શરીફને કસ્ટડીમાં લેવામાં આવ્યો હતો. NIAએ 3 માર્ચે આ કેસનો કબજો લીધો હતો. આ પહેલા મુખ્ય આરોપી મુસાવીર શાજીબ હુસૈનની ઓળખ થઈ હતી, જેણે બ્લાસ્ટને અંજામ આપ્યો હતો. તપાસ એજન્સીએ આ કેસમાં અન્ય કાવતરાખોર અબ્દુલ માથિન તાહાની પણ ઓળખ કરી હતી, જે અન્ય કેસમાં પણ એજન્સી દ્વારા વોન્ટેડ છે. બંને શખ્સો ફરાર છે.
આતંકવાદીઓને લોજિસ્ટિક્સ પૂરું પાડ્યું હતું
NIAની તપાસમાં જાણવા મળ્યું છે કે મુઝમ્મિલ શરીફે વિસ્ફોટ સંબંધિત કેસમાં અન્ય બે ઓળખાયેલા આરોપીઓને લોજિસ્ટિક્સ પૂરા પાડ્યા હતા. આજે આ ત્રણેય આરોપીઓના ઘરની સાથે રહેણાંક જગ્યાઓ અને અન્ય શકમંદોની દુકાનો પર પણ દરોડા પાડવામાં આવ્યા હતા. સર્ચ દરમિયાન રોકડ સહિત વિવિધ ડિજિટલ ઉપકરણો જપ્ત કરવામાં આવ્યા હતા. ફરાર આરોપીઓને પકડવા અને બ્લાસ્ટ પાછળના મોટા કાવતરાનો પર્દાફાશ કરવાના પ્રયાસો ચાલુ છે.
1 માર્ચે કેફેમાં બોમ્બ બ્લાસ્ટ થયો હતો
ઉલ્લેખનીય છે કે, 1 માર્ચે કેફેના બ્રુકફિલ્ડ આઉટલેટમાં ઓછી તીવ્રતાનો બોમ્બ બ્લાસ્ટ થયો હતો. વિસ્ફોટમાં ગ્રાહકો અને હોટલ સ્ટાફ સહિત 10 લોકો ઘાયલ થયા હતા. વિસ્ફોટ થતાની સાથે જ કેફેની અંદર ધુમાડો ભરાઈ ગયો અને લોકો પોતાનો જીવ બચાવવા માટે અહીં-તહીં દોડતા જોવા મળ્યા હતા. શરૂઆતમાં લોકોને લાગ્યું કે કદાચ આ સિલિન્ડર બ્લાસ્ટ હતો.
તપાસ બાદ કેસ NIAને સોંપવામાં આવ્યો હતો
પરંતુ, જ્યારે પોલીસ અને NIAની ટીમ ઘટનાસ્થળે પહોંચી ત્યારે શંકાની સોય બીજી દિશામાં વળી ગઈ હતી.આ પછી મામલો સંપૂર્ણ રીતે NIAને સોંપવામાં આવ્યો હતો. ત્યારપછીની તપાસ દરમિયાન કેફે બ્લાસ્ટના આરોપીઓની કેટલીક તસવીરો સામે આવી હતી. તસવીરોમાં આતંકવાદી બસમાં અલગ-અલગ દિવસે મુસાફરી કરતો જોવા મળ્યો હતો, ક્યારેક કેપ પહેરીને, ક્યારેક કેપ વગર તો ક્યારેક માસ્ક પહેરીને. આ કેસમાં, નેશનલ ઇન્વેસ્ટિગેશન એજન્સી (NIA) એ શંકાસ્પદની તસવીર પોસ્ટ કરી હતી અને તેના વિશે માહિતી આપનારને 10 લાખ રૂપિયાનું રોકડ ઇનામ આપવાની જાહેરાત કરી હતી.
